Polis a detene 52 persona na Playa den weekend

ORANJESTAD – Durante control den fin di siman, polis a logra detene no menos cu 52 persona den dos dia di tempo. E control tabata parti di e listramento preventivo pa busca droga y arma. Tabata e polisnan riba bicicleta cu a toca pa ehecuta gran parti di e control aki.

TEAM DI BICICLETA

Segun sub inspector Johnny Henriquez, -lider di e team di Oranjestad-, e area di enfoke tabata Caya Betico Croes y e cayanan adhunto. Brigadier y miembro di e team di bais, Rolando Ras, a añadi cu esaki ta un experiencia nobo pa nan y cu bicicleta nan ta yega mas cerca di comunidad y sigur unda cu polisnan no ta yega normalmente y facilmente cu auto.

CANTIDAD DI DETENCION

E accionnan riba diabierna y diasabra a resulta masha fructifero, cu un cantidad record di 52 detencion for di cual 28 tabata pa droga of arma. Tambe a logra gara 20 persona ilegal, 3 sospechoso cu tabatin orden di detencion y 15 chauffeur pa stuur auto bao di influencia di alcohol.

OPERACION

Separa di polisnan riba bicicleta, esunnan riba brommer a tene un control riba velocidad den trafico. Esey a sosode diasabra manece diadomingo entre 1:00am y 3:00am. A reparti un total di 30 multa pa velocidad halto, pa cual 8 auto tabata coriendo entre 130km y 150km pa ora mientras 1 brommer tabata coriendo 165km pa ora riba Sasakiweg.