Trey Songz a cumpli cu su fans na Soul Beach

ORANJESTAD - E di tres, -y ultimo anochi-, di e di 15 edicion di Soul Beach Music Festival a clausura cu e artista principal Trey Songz riba tarima pa exactamente 10'or diadomingo anochi. Huzgando na e cantidad di publico, tabata obvio cu e mayoria a bin pa Tremaine Aldon Neverson (30), cu ta usa e nomber artistico "Trey Songz , cu un publico di riba 2000 persona, mayoria turista for di principalmente Merca. Cuminsando e anochi cu e banda local 'Buleria', e artista siguiente Estelle, a presenta pa un publico respeta, pero no a crea e mesun vibracion cu e artista final, Trey Songz a logra. Na comienso di su presentacion, Estelle, visiblemente desapunta cu e publico su reaccion, mester a pidi repetidamente, pa nan move mas. "Mi sa cu ta diadomingo, pero nos no ta na misa", Estelle a grita su publico dado momento. Pero claramente e artista principal di henter e festival, Trey Songz a sa di cumpli cu su publico, poco poco creando mas y mas emocion. Cuminsando cu tiramento di su petchi y despues su bril di solo, cada movimiento di e artista, tabata uno cu tabata elecrifica principalmente e damanan presente. Cu e presentacion di Trey Songz, e di 15 edicion di Soul Beach Music Festival a clausura, lagando tur hende cu un gana pa e proximo edicion. Organisadornan por mira atras riba un exitoso 5 dia di evento, cu a logra trece mas di 2000 turista Aruba, for di e mercado principal, esta Merca.