Kvk: Un di e cambionan mas grandi di 2023 tabata ley nobo pa registra UBO

ORANJESTAD – Den e resumen aki, Camara di Comercio y Industria (KvK) kier trece dilanti un resumen di actividadnan comercial cu KvK a organisa durante 2023, resumen di e cambionan cu a tuma lugar den 2023 y tambe duna un indicacion di e desaroyo di comercio na Aruba basa riba registracionnan di negoshi na KvK.

CAMBIONAN IMPORTANTE DEN 2023

Entrante 1 di januari 2023 a drenta na vigor diferente cambio di ley. E ley nobo pa registra e UBO (Ultimate Beneficial Owner) di companianan finalmente a keda introduci. Ademas, a introduci un version adapta di e Ley di Registro Comercial, pa cual motibo tur fundacion y asociacion cu autoridad legal completo tin e obligacion legal pa registra y paga un contribucion anual na KvK. Alabes, KvK a introduci un cambio importante ora di registra un negoshi nobo. Entrante 22 di november 2023, ora di registra un compania nobo, e doño di negoshi y director/dirigente/socio di e compania lo mester registra su ‘persoonsnummer’ cual ta su number personal registra na Departamento di Impuesto. Cu introduccion y cambionan den ley, KvK tawata ocupa cu varios tarea pa asina cumpli cu esakinan den un manera structura.

ACTIVIDADNAN DI KVK 

Un di e metanan principal di KvK ta pa yuda stimula comercio, y organisa eventonan ta forma parti di esaki. Durante 2023 KvK a organisa varios sesion cu a cubri un variedad di tema, e.o. riba e topico di reforma fiscal, fortifica empresa via ESG, maneho di desperdicio, cybersecurity, pensioen, y BBO na frontera.

KvK a organisa varios actividad pa nos empresarionan durante e aña aki. 

•        Na februari a organisa un networking event unda cu invitadonan por a disfruta di un anochi placentero y cera conoci cu e directiva di KvK pa 2023.

•        Na comienso di maart a organisa un Business Empowerment week. 

•        Na mei, den colaboracion cu Minister di Economia, Comunicacion y Desaroyo Sostenibel, a organisa un mision comercial, caminda 22 comerciante, represantando 15 compania di Aruba, a bishita Colombia. E delegacion comercial tabatin mas cu 100 cita cu comerciantenan Colombiano y a keda hopi satisfecho cu e calidad di e citanan ricibi. Durante e mision comercial, Sr. Gavril Mansur, presidente di KvK, a asisti na varios reunion, conhuntamente cu Minister Geoffrey Wever, pa fortalece e lasonan comercial entre Aruba cu Colombia.

•        Na juni a organisa un business mixer caminda KvK a invita comerciantenan representando un variedad di sector pa un encuentro ameno cu e meta pa comparti conocemento y establece relacion valioso.

•        Business Plaza a tuma luga na juli. 

•        Den luna di oktober, KvK a organisa su gran evento anual ‘Aruba Chamber Business Event’. Pa e edicion aki e topico tabata ‘Securing your financial freedom: the path to financial freedom begins here’. Durante e evento aki tur presente a haya hopi informacion valido y practico con pa maneha nan finansa y logra nan libertad financiero. 

•        Na november a tene inauguracion di art expo nobo. 

•        Un bes mas, den colaboracion cu Minister di Economia, Comunicacion y Desaroyo Sostenibel, a organisa un Business Matchmaking virtual entre empresarionan di Aruba y Venezuela. Pa prome biaha den historia a tuma lugar un mision comercial na Aruba completamente virtual, na unda a participa 30 empresario di Aruba y mas di 100 empresario di Venezuela. 

•        Manera ta custumber tur aña a organisa e curso Empresario Independiente y e curso FAB (‘Financiële Administratie voor beginners’). 

KvK por wak bek na dos mision comercial exitoso cu a tuma luga e aña aki.Ta e intencion pa otro aña KvK continua cu e eventonan, sesionnan y misionnan comercial pa asina duna atencion na diferente topiconan interesante y duna informacion practico na nos comerciantenan, alabes yudando nos comerciantenan crea mas lasonan comercial cu companianan den exterior. 

APORTE Y SOSTEN

Siendo e organisacion y cuerpo representativo di comercio na Aruba, KvK continuamente ta percura pa fortalece laso cu sector comercial, brindando e apoyo necesario tanto na startups como tambe na negoshinan existente. Pa logra esaki ta sumamente importante pa traha conhuntamente cu partners relevante y mantene e contacto y bon relacion. Durante 2023, KvK a asisti na diferente reunionnan cu Gobierno encuanto e deliberacionnan cu Hulanda riba e topico di RAFt. Ademas, KvK ta den combersacionnan continuamente cu Minister di Economia riba topiconan concerniente.