ATA lo monitoria efecto di pelicula ‘Invasie’ den e media Hulandes

ORANJESTAD - Oficina di Turismo, A.T.A. tambe a tuma nota di lansamento di un pelicula thriller emocionante cu ta presenta Aruba y Curaçao como e ‘backdrop’.Asina e CEO Ronella Croes a reacciona pa noticiacla riba e pregunta di e posibel efectonan cu tin di e pelicula pa cu Aruba. Particularmente nos turismo. Esaki pasobra e pelicula ta trata di un invasion di pais bisiña riba Aruba y Corsou, incluyendo cu atake riba beachnan. Croes ta splica cu e storia ta parse di ta un inspiracion for di situacionnan geopolitico. E ta keda si basicamente un pelicula basa riba un ficcion y pues no riba eventonan real.

TA SIGUI COBERTURA DEN MEDIA

“ Actualmente nos ta sigui di cerca e cobertura den media y e reaccion di e publico pa cu e pelicula” Croes a sigui bisa. Segun Croes, oficina di turismo di Aruba ta anticipa cu e enfoke lo ta riba e aspectonan cinematografico, historia, y talento di Hulanda como productor di peliculanan emocionante. “E intencion di e director ta pa atrae un audiencia hoben y mustra heroismo, solidaridad, y perseverancia como temanan central cu ta subraya e naturalesa positivo y entretenido di e produccion”.

ALERTA 

ATA ta keda den alerta y lo keda monitoria con e pelicula aki ta wordo percibi den e media Hulandes segun e CEO su comentario. “Te cu awo no tin motibo di pensa cu esaki lo tin un influencia negativo di e percepcion di Aruba como un destinacion sigur y deseabel”.

“Segun desaroyonan ta tuma luga, A.T.A. lo sigui evalua e situacion y brinda actualisacion segun necesario” Croes a sigui bisa. 

EXPANSION DI PROMOCION NA HULANDA 

Ta relevante menciona cu na es momentonan aki A.T.A. a expande su promocion na Hulanda grandemente asina por tuma nota di billboards y hopi otro promocion extra di Aruba den e mercado.