Prohibicion di benta di vuurwerk den municipionan na Hulanda ta ganando tereno

AMSTERDAM – E aña aki, pa cambio di aña tin un prohibicion pa vuurwerk den por lo menos 16 municipio. Esey ta 4 mas cu aña pasa segun e portal Hulandes NOS. E municipionan Arnhem, Eindhoven, Tilburg y Amersfoort a uni nan mes na e municipionan cu kier prohibi vuurwerk. Den e municipionan ey tin 3.1 miyon Hulandes, cu ta 18 % di e poblacion. “Nos a ripara cu ultimo añanan tin mas y mas destruccion y mal comportacion” e alcalde di Amersfoort, Lucas Bolsius a bisa den e programa radial noticioso NOS Radio 1 Journaal.  Otro aña e municipionan Zwolle, Zutphen y Ede tambe ta participa. Awe e benta di vuurwerk ta cuminsa na Hulanda y por bende vuurwerk riba 3 dia legalmente, esta 28, 29 y 30 di December. Como cu bispo di aña nobo ta cay riba un diadomingo, 31 di December no mag bende vuurwerk.