Banco Central di Aruba a reduci e tasa di reserva obligatorio

ORANJESTAD - Conforme e tarea di e Comite di Maneho Monetario (CMM) pa evalua, determina y duna transparencia riba e accionnan di maneho monetario di Banco Central di Aruba (BCA), BCA ta comunica lo siguiente. Durante e reunion di 24 di october 2023, CMM a dicidi pa baha e tasa di e reserva obligatorio cu 1,0 punto di porcentahe na 22,5 porciento entrante 1 di november 2023. Di e manera aki, e banconan comercial mester tene un balansa minimo na BCA cu ta igual na 22,5 porciento di e depositonan riba termino cortico di nan clientenan. E decision pa reduci e tasa di reserva obligatorio ta basa primordialmente riba e reservanan oficial y internacional cu a permanece na un nivel adecua,  apesar di un caida te cu 29 di september 2023 compara cu fin di 2022. Tambe, reservanan oficial y internacional ta premira di keda adecua y subi durante e resto di 2023. Adicionalmente, likides excesivo di e sector bancario a baha na september 2023 compara cu december 2022, primordialmente causa pa un subida den credito. BCA ta sigui monitorea e desaroyo den e reservanan y likides excesivo y lo por dicidi di cambia e tasa di reserva obligatorio, si ta considera esaki necesario.

CMM a considera e siguiente informacion y analisis den su deliberacion.

RESERVANAN INTERNACIONAL Y OFICIAL

E reservanan internacional, cu ta consisti di reservanan oficial di BCA y reservanan di divisa na e banconan comercial, a baha cu Afl. 259,6 miyon te cu 29 di september 2023, compara cu fin di december 2022 (Grafico 1). E reservanan oficial a mengua cu Afl. 243,2 miyon, mientras cu e reservanan na banconan comercial a baha cu Afl. 16,4 miyon. Consecuentemente, te cu 29 di september 2023, e reservanan oficial y internacional a suma Afl. 2.547,7 miyon y Afl. 2.981,7 miyon, respectivamente. 

Sostene un nivel adecua di reservanan ta esencial pa mantene e tasa di cambio fiho entre e florin Arubano y e dollar Mericano. Teniendo cuenta cu esaki, apesar di e caida menciona anteriormente, reservanan internacional a keda ampliamente riba e rekisito di tres luna di pago riba e cuenta coriente di e balansa di pago den september 2023. E pagonan riba e cuenta coriente di e balansa di pago ta consisti, entre otro, di pagonan pa importacion, pagonan di interes na inversionistanan stranhero y transferencianan pa exterior manera placa manda afo door di trahadonan stranhero. Reservanan oficial tambe a keda dentro di e margen aceptabel basa riba e metrico ‘Assessing Reserve Adequacy’ (ARA) di e Fondo Monetario Internacional (FMI) 

INFLACION

Inflacion, midi na final di luna contra e mesun luna di e aña anterior, a baha na 0,5 porciento den augustus 2023, un caida compara cu 1,7 porciento na juli 2023 (Grafico 2). E contribuyentenan principal na e inflacion, midi na final di luna contra e mesun luna di e aña anterior, na augustus 2023, tabata ‘comunicacion’ (contribuyendo cu 0,6 punto di porcentahe) y ‘cuminda y bebida no alcoholico’ (contribuyendo cu 0,5 punto di porcentahe). Aunke na un grado mas abou, ‘diferente producto y servicio’ (contribuyendo cu 0,4 punto di porcentahe), ‘restaurant y hotel’ (contribuyendo cu 0,3 punto di porcentahe), y ‘educacion’ (contribuyendo cu 0,2 punto di porcentahe) tambe a aporta na e inflacion, midi na final di luna contra e mesun luna di e aña anterior, den augustus 2023.

E inflacion midi riba promedio di 12 luna a baha na 4,9 porciento na augustus 2023; un caida compara cu 5,6 porciento durante e luna anterior. E presion inflacionario tabata debi na aumento den prijs di cuminda y bebida no alcoholico y e subida den e tarifa di awa y coriente desde augustus 2022. Ademas, Aruba a importa un gran parti di e crecemento den prijs for di su partnernan comercial, particularmente Estados Unidos y Europa. 

Mientrastanto, na augustus 2023, inflacion basico (excluyendo cuminda y energia) a alcansa 1,2 porciento si midi e final di respectivo luna contra e mes un luna di e aña anterior (juli 2023: 1,0 porciento). Basa riba un promedio di e ultimo 12 lunanan, inflacion basico a yega na 2,1 porciento (juli 2023: 2,2 porciento). 

LIKIDES EXCESIVO DI E BANCONAN COMERCIAL

Basa riba data semanal, estimacion preliminario di likides excesivo di e banconan comercial (incluyendo credito cu no a wordo aloca ainda y otro compromisonan) tabata Afl. 407,0 miyon riba 29 di september 2023, esta, Afl. 65,5 miyon mas hopi compara cu augustus 2023 (Grafico 3). E subida aki ta causa primordialmente pa e bahada di 1 punto di porcentahe den e tasa di reserva obligatorio desde 1 di september 2023. Di otro banda, ora cu compara cu fin di december 2022, likides excesivo ta refleha un contraccion di Afl. 412,8 miyon. E caida aki tabata principalmente debi na refinanciamento di fiansanan internacional riba mercado local y compra di bono di gobierno pa inversionistanan institucional.