Tipnan balioso pa bo cacho den temporada di klapchi

ORANJESTAD – Cu benta di klapchi, ta bin un otro dolor di cabes pa doño di mascota, specialmente cacho. Cachonan nan orea ta desaroya miho cu e ser humano, cu ta pone cu nan por scucha cosnan miho cu e ser humano. Normalmente esey ta algo positivo, pero den e caso aki, e ta traha den nan contra. Y consecuentemente, e ta pone cu durante e periodo ‘chikito’ di awor te fin di aña, e cacho ta experencia su temporada di mas pio di aña. NoticiaCla.com ta publica algun tips di Aruba Dog Academy cu por ta util, pa un persona cu tin cacho(nan), por sigura cu nan ta pasa e periodo aki mas trankil y miho.

TIPNAN PA BO CACHO DURANTE TEMPORADA DI KLAPCHI

Percura pa a haci hopi ehercicio cu bo cacho(nan), sea e mesun dia of e dia anterior. Esaki por ta caminata largo y structura. Cu structura, nos kiermen, lidera e cana, pa asina e cacho tin cu ta enfoca mentalmente y fisicamente. Asina e ta cansa mas lihe y profundo y por ta mas relaha despues ora cu tin klapchi. Sigur riba e anochi di cambio di aña. Tene bo cachonan den cura, y percura pa e cura ta suficiente na ordo y halto of di tal manera cu e cacho no por bula esaki, en caso e spanta di e klapchi. Un cacho den stress por bula muraya hopi halto. Si e muraya no ta hopi halto, murayanan cu tin staka di hero of alto cu ta stroba e cacho di tin un ‘houdvast’, e cacho no ta comfortabel pa bula e cura. Depende e situacion di e cas y grandura di bo cas, por pone e cacho paden, cu musica como distraccion y tambe e compania di hende. E cacho ta sinti su mes den compania y ta distrai un forma placentero. Y cerca hende e ta mas trankil. Nunca tira klapchi den cercania di e cacho(nan). No forsa nan pa ta cerca tampoco. Nan ta keda traumatisa y no ta bin despues ora cu bo yame(nan). Klapchi no ta nan miho amigo. Laga nan trankil y leu di klapchi. Si e cacho ta custumbra di ta den un kennel, lag'e eyden. Hopi cacho ta asocia kennel (crate) cu algo positivo y nan lugar di refugio. Si nan no ta custumbra, no bay pusha nan den e kennel. Nan lo bira mas agresivo y purba haci tur posibel pa sali afo. Nan te hasta por haci nan mes daño e ora. Percura pa bo cacho ta bon identifica. Sea un banchi cu su nomber y telefon di e doño. Of chip bo cacho. E banchi por kibra y perde liher y e ora e identificacion tambe a bay perdi. Laga bo cacho den compania di su coi hunganan faborito of treatnan cu e ta gusta pasa tempo ariba. 

ACTUA NORMAL ROND DI BO CACHO

Actua normal rond di bo cacho ora di klapchi. Nan ta sigui e patronchi di hendenan cu ta ‘trankil’ y normal. Si bo actua excita, nan tambe ta excita y no ta rasona ni controla mas. Ora cu un cacho ta spanta y ta core bin cerca bo, NO aai e cacho. E estado den cual e cacho ta (stressed, miedo) no ta e momento pa aai e cacho. Si bo aai e cacho e momento ey, bo ta dun'e e señal cu ta OK pa tin miedo. Haci normal. Actua normal, y e cacho lo compronde cu tur cos ta ok, incluyendo e zonido ‘duro’ di clapchi. 

PILDER COMO CALMANTE

Si mester, por uza pilder calmante. Veterinarionan ta bende esaki y ta bende a base di e peso di bo cacho. Sa e peso di bo cacho prome bo bay veterinario. E veterinario lo sa e dosis di duna, a base di e peso. Normalmente e efecto ta drenta den e cacho, mey ora despues. No bay duna bo cacho dimas pa no overdose e cacho.