MEP na Hulanda pa reunionnan di IPKO y tripartite

ORANJESTAD - E delegacion di MEP encabesa pa Evelyn Wever-Croes tambe a sali pa Hulanda caminda lo atende den dos serie di reunion importante. E miembronan di e partido, Evelyn Wever-Croes, Xiomara Ruiz-Maduro y Ady Thijsen lo representa e fraccion geel.

TRIPARTITE

Dialuna y diamars tin reunionnan tripartiet cu delegacionnan di Curacao y Sint Maarten. Lo toca varios tema di cooperacion mutuo entre otro desaroyo economico, energia, enseñansa, integridad, salubridad, problema cu hobennan, discriminacion.

Pero lo trata temanan delicado tambe manera e intervencion recien di Gobernador na Aruba y na Sint Maarten y tambe screening di candidato pa minister. E meta di e reunionnan aki ta pa caminda cu paisnan por traha hunto den bienestar di nan ciudadanonan, pa logra mas bienestar posible

IPKO

Diaranson te cu diabierna tin e reunionnan interparlamentario entre parlamentonan di Aruba, Hulanda, Curacao y Sint Maarten. Riba agenda tin practicamente e mesun topiconan cu e reunion tripartiet cu excepcion di esun di intervencion di Gobernador, Adicional tin riba agenda di IPKO e tema di areglo di disputa entre paisnan den Reino a base di Statuut. Tambe lo trata iniciativa di Parlamentario Hulandes van Oven pa cambia art 14 y 38 di Statuut. E dos temanan aki y e tema di 'integridad' y 'screening di candidato ministernan' ta e temanan mas delicado y ta ser spera bastante discusion riba e temanan. E reunionnan lo tuma lugar den salanan di Eerste Kamer y Tweede Kamer y mayoria por wordo sigui via website di Tweede Kamer.

VARIOS OTRO REUNION

Aparte di e reunionnan menciona e delegacion tin otro reunionnan planea cu varios otro politico, gobernante y organisacionnan.

"Nos a prepara bastante pa e reunionnan aki y awor ta asina leeuw. Nos a bin cu un mision y esey ta pa logra mas bienestar pa nos pueblo y pa haya mas claridad den e situacion relaciona cu supervision di Aruba. Nos lo splica na Hulanda cu nos no ta di acuerdo cu e supervision impone riba Aruba ni e caminda cu a wordo encamina. Sinembargo nos ta conciente cu algo MESTER a wordo hasi pa para e mal gobernacion di Mike Eman y pesey e supervision mester a bin. Loke nos kier pa tur hende compronde ta cu no ta husto cu den e proceso ey nos pueblo ta wordo suta cu medida mientras cu gobierno mes no ta corta den su gastonan manera manda dos minister cas. Tambe nos kier pa tur hende compronde cu asina cu Aruba haya un gobierno drechi bek, no tin necesidad di supervision door di Hulanda. Un gobierno drechi manera MEP tin den preparacion mes por controla su mes atravez di su propio institutonan. MEP a demostra di por a goberna e pais aki drechi, prueba entre otro cu a laga tanto e debe nacional como e deficit den margen nan internacionalmente aceptable. Si e maneho di MEP a wordo continua despues di 2009 y e margennan impone e tempo ey no a wordo bandona pa AVP awe nos no ta den e problemanan cu nos ta. Aruba merece mihor. Esey lo ta nos mensahe na Hulanda" asina lider di MEP Evelyn Wever-Croes a duna di conoce.