Hopi atencion na Venezuela riba advertencia di Aruba di nenga asilo si cruza laman ilegamente

ORANJESTAD/CARACAS – Tur cos ta lmustra cu e mensahe di minister di husticia Rocco Tjon, dirigi na pais bisiña sea Venezuela y Colombia pa cu cruzamento di frontera illegalmente, a yega. E fin di siman aki, Noticiacla a tuma nota di un cantidad grandi di medio Venezolano cu a reproduci e mensahe aki y e noticia aki a plama grandemente na Venezuela. E pregunta ta awor, si esaki ta suficiente pa demotiva potencial cruzador di laman pa Aruba y Corsou, of si e odisea lo continua sin mas. 

E MENASAE minister encarga cu Husticia, recientemente manera cu a keda publica den Noticiacla, a manda un advertencia serio pa tur esnan cu tin pensa di cruza laman di forma illegal y yega Aruba cu e intencion pa cuminsa un bida nobo y of pidi asilo politico. E mensahe tabata hopi cla cu si ta haci, esta cruza frontera di un forma illegal, y logra yega Aruba bibo, automaticamente lo no haya oido pa peticion pa asilo politico. E advertencia ta pa demotiva hende cu tin e intencion aki. Hopi di e personanan cu ta haci e cruzada, ta logra yega Aruba pero mayoria cu logra cruza y yega bibo, ta keda deteni y despues deporta. Pero mas y mas, e cruzada ta conociendo un fin desagradabel unda cu tin bida cu ta bay perdi, cu tur su consecuencia. Recientemente no menos cu 4 persona a perde nan bida, di cual uno a keda te hasta desfigura y di cual a haya solamente parti di e curpa.