Mansur riba conseho AG: Aruba un stap mas cerca di igualdad matrimonial

ORANJESTAD – “Aruba ta un stap mas cerca di igualdad matrimonial” ta e prome reaccion di e parlamentario y lider di partido ACCION21, Miguel Mansur pa noticiacla.com diabierna atardi, riba e conseho di Abogado General den caso di casacion riba matrimonio di mesun sexo pa Aruba y Corsou. 

Mansur ta splica cu Advocaat-Generaal a emiti su recomendacion na Hoge Raad pa e veredicto di HOF di 6 december 2022 permanece, habriendo matrimonio na parehanan di mesun sexo. Un penultimo stap prome cu Hoge Raad dicta na mei di 2024. Mirando cu den mas cu 80% di caso Hoge Raad ta sigui conseho di Advocaat-General, probabilidad ta grandi cu igualdad matrimonial lo bira un realidad na Aruba y Corsou na 2024 y pa implicacion na Sint Maarten tambe. Esey lo nifica cu finalmente ciudadanonan na tur parti di Reino lo tin mesun derecho di casa cu e persona cu nan stima, un victoria importante. 

CREDITO PA FUNDACION ORGUYO

Credito pa e logro segun Mansur, ta danki na Fundacion Orguyo cu a cana e caminda legal cu nos ta spera pronto lo culmina cu un victoria historico. Desde e caso den prome instancia Land Aruba no a contradeci e ponencia cu un persona su orientacion sexual no ta un resultado di escogencia pero un predisposicion biologico. Den e caso na HOF Land Aruba no a contradeci e ponencia cu exclui parehanan di mesun sexo di matrimonio ta discriminatorio. Advocaat-Generaal mescos cu HOF ta conclui cu Constitucion di Aruba ta brinda hues e derecho di test un ley contra nos staatsregeling y consecuentemente e derecho pa coregi un ley. E conclusion no ta un sorpresa pa ningun hende cu a studia e materia di un forma neutral.

PREMIER A SCONDE CONSEHO

Segun Mansur, Minister President, sra. Evelyna Wever-Croes, a sconde e cassatie-advies fe su propio ministerraad y nenga di comparti esaki cu Parlamento. Un dia esaki lo mira luz di dia y probablemente lo keda comproba cu e decision di MEP pa bay cassatie tabata uno politico. E posicion di gobierno ta demostra un biaha mas cu e partido geel ta un partido cu ta para pa discriminacion; contra minorianan sexual, contra personanan color scur, contra stranhero etc. E ta lamentabel cu sra. Wever-Croes te awe ta demostra cobardia y un falta di liderazgo mirando cu e no por publicamente vocifera na fabor of contra di igualdad matrimonial. Lider di AVP, sr. Mike Eman, a vocifera cu su partido ta dividi riba e topico pero e tampoco ainda no a eherce e curashi di publicamente declara su posicion personal. 

CREA SOCIEDAD MAS INCLUSIVO

Crea un sociedad mas inclusivo cu menos intolerancia mester ta meta di tur segun Mansur, lidernan cu no por publicamente declara nan mes na fabor di esey no ta cualifica pa guia nos pais den futuro. Riba igualdad matrimonial MEP no a simplemente carece di liderazgo pero tambe obstrui funcionamento debido di nos institutonan. Un concepto di ley pa habri matrimonio pa parehanan di mesun sexo ta cla pa ser trata den Parlamento desde october 2023 pero MEP ta obstrui su tratamento. E hipocresia di gasta placa di pueblo bay cassatie argumentando cu ta parlamento mester tuma e decision y despues obstrui e concepto di ley wordo trata den parlamento argumentando laga Hoge Raad tuma e decision ta emblematico di politica cobarde. 

OPOSICION NA IGUALDAD

E oposicion segun Mansur na igualdad matrimonial a bin principalmente di gruponan evangelico. Nos por mira un pastor di Corsou vocifera contra y MEP permitiendo e separacion di misa y estado ser derumba den nan angustia pa purba scapa voto. Na Corsou segun Mansur, misanan ta envolvi den politica, algo cu no ta parti di nos cultura y tampoco algo cu nos kier adopta. Otro gruponan religioso encabesa pa pastornan stranhero di paisnan bisiña tambe a bin parlamento gaba nan trabaonan social. Ta curioso cu pastornan stranhero ta bandona nan propio paisnan caminda tin hopi mas necesidad social pa bin biba na Aruba den luho, core auto caro, bisti paña di marca, manda nan yiunan scol priva y kere cu nan por dicta riba decisionnan politico. Separacion di misa y estado ta sagrado y algo cu nos ta spera e proximo gobierno lo reestablece pa evita cu nos sociedad ta ser defini pa cualkier teologia. 

MENSAHE DI PAPA

Mansur ta recorda cu durante 2023 nos a mira Papa Francisco haci iglesia Catolico uno mas inclusivo permitiendo bendicion di parehanan di mesun sexo, bautismo di yiunan di parehanan di mesun sexo, bautismo di personanan trans y permiti nan sirbi como padrino y madrina. Nos religion oficial y e denominacion mas grandi di nos pais a progresa pa bira uno mas tolerante reconociendo cu nos tur ta yiu di Dios. Desafortunadamente Aruba no a ser scapa di e gueranan cultural y tin esnan, incluso lidernan religioso, dispuesto di mal informa, instiga y comporta di un forma no-Cristian basta nan purba logra imposicion di nan doctrina y/of interpretacion di scritura riba henter comunidad. Berdad igualdad matrimonial ta un topico cu ta dividi opinion, pero manera HOF a dicta, derechonan constitucional no ta depende di opinion di ningun minoria of mayoria. 

UN STAP MAS DILANTI

Awe Aruba a dal un stap dilanti pa un sociedad mas inclusivo y tolerante caminda tur hende ta balora, aprecia, respeta y stima. Nos ta spera cu e lucha pa igualdad matrimonial ser completa na 2024 y mescos cu tabata e caso na Bonaire, Saba y St. Eustatius e lo drenta na vigor sin cambio remarcabel pa mayoria di persona. Tur cambio social ta dividi pero nos ta progresa ora nos enfoka riba loke ta uni nos manera combati pobresa, mehora enseñasa, mehora salubridad, reduci criminalidad, aumenta progreso profesional etc. Ban hinca nos energia y esfuerso den e metanan ey luga di purba exclui personanan di nan derechonan constitucional.