Van Huffelen contento cu conseho di AG riba matrimonio di mesun sexo pa Aruba y Corsou

DEN HAAG – Secretario demisionario di Estado Hulandes Alexandra van Huffelen ta contento cu e conseho di Abogado General Snijders di awe mainta, riba e caso di matrimonio di mesun sexo. Manera ta conoci, awe mainta e conseho di e AG a keda publica. Durante un encuentro cu prensa di Reino Hulandes, e mandatario a comenta brevemente riba e tema aki tambe. 

CASO IMPORTANTE

E mandatario a ripiti su ponencia riba e tema sensitivo aki, unda cu e ta bisa cu e ta haye hopi importante cu hende di e mesun sexo cu kier casa cu otro, mester por haci esaki tambe. “Mi sa si cu e caso ta andando ainda. E conseho cu e Abogado General a haci ta un paso importante” e la sigui bisa. Mes momento e ta bisa tambe cu e ta conciente cu e sentencia final ta bin di Hoge Raad cu ta spera den mei di otro aña. “Nos tin cu spera esey ainda pero mi ta contento caba cu e conseho aki, pasobra e ta exactamente den direccion di loke nos ta haya hopi importante cu ta sosode y ta posibel, esta cu si dos homber of dos muher kier casa cu otro, cu esaki ta posibel na Aruba y Corsou”, e mandatario a finalisa bisando. Por scucha e declaracion di e mandatario Hulandes AKI.