Famia di 20 hende biniendo Aruba 19 aña pa Pasco, a bira enfoke di raportahe na Miami Airport

MIAMI – Un famia Mericano di 20 persona biahando pa Aruba pa dianan di fin di aña, diripiente a bira e ‘enfoke’ di un raporta di e canal di television CBS 4 di Miami, na Florida, riba e dianan ocupa di biahe. E raportahe mester a enfoca riba e trafico pisa cu tin na e aeropuerto di Miami na Florida, y aki a scohe un famia pa comenta. A resulta cu e famia en cuestion, di fam Pfua, stima Aruba y tabata na caminda ‘atrobe’ pa nos isla. 

BAYENDO ARUBA 19 AÑA SIGUI

E periodista a scohe e famia di Mandy Pfau, pa haya su comentario riba su biahamento. Aki Pfau a confesa cu e ta bayendo Aruba, un custumber familiar di 19 aña caba (e mes tin 21 aña pues ta biniendo Aruba anualmente desde cu e tin 2 aña!). Segun Mandy, e ta gusta e detaye na Aruba ora cu p.e. Santa Claus ta bishita e piscina, y desea tur hende Bon Pasco. “E ta un dushi experiencia” Pfau ta bisa entre otro. 

AEROPUERTO OCUPA

E aeropuerto ta spera mas di 2.7 miyon pasahero durante e periodo di biahe di 17 dia, riba cual ta spera un average di 162 mil biahero. Esaki ta un aumento di 6.1% compara cu e aña record di aña anterior. E dianan ‘peak’ ta December 22-23, December 26-30 y januari 2-6 ora cu traffic lo probablemente surpasa 165 mil biahero. Diadomingo ultimo so caba, 171,371 pasahero a pasa door di e terminalnan di aeropuerto, marcando e dia cu mas pasahero riba un solo dia den historia di e aeropuerto.