Wever: Na januari 2024, e rapport riba investigacion na DIP ta presenta recomendacionan necesario

ORANJESTAD - Na januari lo haya e prome rapport cu recomendacionnan con pa sigui y cua pasonan mester tuma pa haci DIP un departamento fuerte y resiliente. Hunto cu trabounan di reorganisacion y reconstruccion di e departamento, cu tambe lo bay cuminsa, e recomendacionnan aki ta e yabi pa DIP ta exitoso den futuro. Asina prome minister Evelyn Wever a bisa despues di a reuni cu señora Simone van der Zee kende ta encarga cu un estudio (“weerbaarheidsonderzoek”) pa resiliencia na diferente departamentonan di Gobierno. Bou di peticion di Prome Minister, señora van der Zee a haci e estudio aki tambe den Departamento di Infrastructura y Planificacion (DIP) pa haya sa con fuerte y resiliente DIP ta contra influencia y intentonan di corupcion di awo y pa den futuro. 

CORUPUCION

Segun e prome mandatario, manera conoci, e departamento aki a sufri hopi bou di corupcion di mandatarionan di pasado. Ministernan di Infrastructura prome cu Prome Minister Evelyn Wever-Croes, a bisa cu a haya nan involucra cu husticia pa motibo di nan maneho. Y algun investigacion hopi serio a wordo produci cu a manca e departamento. E ministernan envolvi tawata mas preocupa pa yuda nan amigonan cu atende cu e retonan di e departamento haciendo e departmento hopi swak. 

TRABOU DI VAN DER ZEE

Prome Minister a duna di conoce cu Señora Simone van der Zee a traha e rapport y tawata tin hopi bon cooperacion di henter e team di empleado di DIP. Diferente conbersacionnan a tuma luga den e departamento. Señora van der Zee tambe ta conclui cu e heridanan ta grandi den e departamento, resultado di e mal maneho di e ministernan anterior, pero ta ripara cu awo tin animo y speransa cu aworaki si cosnan ta bay ta miho.