AG: Mantene sentencia di Corte pa habri matrimonio mesun sexo na Aruba y Corsou

DEN HAAG – E decision di Corte Comun di husticia di Aruba, Curaçao, Sint-MaartenBonaire,  Sint-Eustatius y Saba, esta Hof, pa habri matrimonio di pareha di mesun sexo na Aruba y Corsou, por keda vigente, osea ta corecto. Asina Abogado General Snijders a conseha Hoge Raad awe den su conclusion di awe den e casonan di casacion cu tanto Aruba y Corsou a entama contra e decision aki.  E conseho aki a bin hopi mas tempran cu palabra, cu tabata mitar di januari 2024. Sinembargo e conseho a keda cla awe caba, casi un luna prome cu e tempo anuncia. Tambe mester tene cuenta cu Corte di Casacion ta tuma casi semper e conseho di AG integralmente. Den e caso di casacion contra ex minister Paul Croes, tambe a tuma e conseho di e AG integral. E sentencia final di Hoge Raad ta poni pa wordo duna dia 31 di mei di 2024, esta casi mitar di otro aña. 

PENSAMENTO

Segun AG, e keho di casacion di Aruba y Corsou ta infunda. E staatsregeling di e dos paisnan aki ta duna e huez e autorisacion pa toets e ley contra e.o. e prohibicion di discriminacion di e staatsregeling. E prohibicion di discriminacion na Aruba y Corsou ta mescos cu esun na Hulanda. Esaki kier men cu discriminacion contra orientacion sexual tambe ta prohibi na Aruba y Corsou. Cualkier ley cu ta enpugna cu e prohibicion ey, mester wordo ignora pa e tribunal. Pa lesa e conseho completo di AG, click AKI.