CBCS: Acuerdo riba solucioon pa ENNIA ta garantisa pago di pensioen

WILLEMSTAD - Banko Sentral di Kòrsou i St. Maarten (CBCS) ta anunsiá ku a yega na nivel tékniko na un akuerdo riba liñanan grandi ku gobièrnunan di Kòrsou i St. Maarten riba un solushon kaminda lo no bai kòrta den pólisa di esnan ku un seguro di penshun na ENNIA Leven.

Ku e anunsio aki CBCS ta konfirmá loke EXTRA pa algun dia kaba ta informá riba dje, esta ku un terminashon kontrolá di ENNIA Caribe Leven (ECL) ta for di mesa i ku ta trahando riba un “doorstart” di e kompania. “A base di e akuerdo riba liñanan grandi lo realisá un ‘doorstart’ parsial di ECL”, CBCS ta informá.

“Ku e solushon aki ta garantisá kontinuidat di servisio ku ENNIA groep ta duna inkluso seguronan di bida.” Promé ku implementá di e solushon aki, esta e “doorstart” parsial CBCS ta bisa ku mester risibí e aprobashonnan nesesario manera lei i reglanan di Kòrsou i St. Maarten ta deskribí.

CBCS lo informá tur partido di interes den ENNIA mas mihó posibel di e progreso i implementashon di e solushon ku a yega na dje. Durante e proseso aki CBCS lo sigui vigilá interes di tur kreditor di ENNIA groep, inkluso tur esnan ku un pólisa.

Manera EXTRA a informá kaba e solushon aki ta enserá ku gobièrnu di Kòrsou for di su presupuesto lo pone 30 mion disponibel pa un periodo di 30 aña pa garantisá pago di penshun di tur esnan ku un pólisa na ECL. CBCS di su banda tambe lo duna un aporte i ta garantisá tur aña pago di un suma na dividendo na gobièrnu destiná pa garantisá ku ECL por kumpli ku su obligashonnan na klientenan. NOTA: Texto ta scirbi den Papiamento fonetico di Corsou.