Sentencia contra Desi Bouterse di 20 aña prizon pa e asesinatonan di December ta definitivo

PARAMARIBO – Ex presidente di Surnam Desi Bouterse a keda sentencia definitivamente na 20 aña di castigo di prizon pa su envolvimento den e asina yama ‘asesinatonan di December di 1982. Corte di husticia di Surnam den apelacion a confirma e sentencia aki di e ex presidente. Bouterse (78) mes no tabata presente pa e sentencia. Ministerio Publico a exigi 20 aña den e apelacion. A pidi tambe pa detene mesora pa encarcelacion, algo cu no tabata pidi anteriormente. Sinembargo Corte no a honra e ultimo peticion aki. Pues Bouterse no mester presenta mesora na prizon. E caso ta trata di un caso di asesinato di 15 persona contrincante di e regimen di Bouterse ora cu e tabata dictador di e pais. E caso a tuma lugar e anochi di 7 pa 8 di December 1982. Ta trata di periodista, sindicalista y abogadonan cu a wordo tira mata e anochi ey. Na 2019 Bouterse a wordo sentencia caba. Pero Bouterse a apela y na 2021 tabatin un sentencia igual. Aworaki e sentencia aki ta uno definitivo.