Trahadornan di ABC Tours a para trabou y mustra nan malcontento

ORANJESTAD - Awe mainta FTA a yama un accion na ABC Tours. Trahadornan a bira miembro di FTA, pa cual motibo FTA a puntra gerencia pa boluntariamente reconoce FTA, pa por tuma decision si FTA mester solicita pa un referendum. Awe mainta dirigente di FTA a wordo informa cu un di nos miembronan a wordo suspendi pa un discrepancia di pago den bonus cu e trahador a bai pidi mas informacion na gerencia, pa cual motibo a wordo suspendi den mal forma. E trahador a wordo baha for di memey di un tour. E hecho aki di parti compania a trigger pa e trahadornan yama FTA pa para trabou, pasobra ta net pa e motibo di e actitud aki di compania cu ta un forma arbitrario contra e trahadornan, cu inecesariamente ta crea tension na trabou, a pone pa e hemchi bai over.

Loke ta positivo ta cu e director di ABC Tours a tuma contacto cu FTA pa combersa y ta willing pa yega na acuerdo. E intencion di FTA ta pa yega na acuerdo unda compania ta reconoce FTA y no bai referendum y no trece daño na e compania, pero mester mustra si cu e derecho di trahadornan mester wordo respeta. A acorda cu dia 27 December 2023 pa 11’or mainta pa papia riba e situacion di e miembro concerni y yega na un acuerdo colectivo. E demanda di FTA ta cu e dianan di trabou ta wordo paga, maske fisicamente no tabata na trabou pa motibo cu compania no ta permitie pa traha. Tene un hende na cas sin un motibo valido no ta husto. Como miembro di sindicato bo ta wordo proteha pa e sindicato. E trahador no mester tin miedo, pesey e trahador mester afilia su mes na un sindicato cu ta un derecho di trahador basa riba ley y tratadonan internacional. E decision di e trahador pa bira miembro di un sindicato no ta algo malo, sino ta un esfuerzo di e trahador pa yega na entendimentonan pa mehora e situacion na pia di trabou cu ayudo di e sindicato.