Gerente a suspende trahadonan di Ling & Sons

ORANJESTAD – Un total di 2 trahado a keda suspendi na Ling & Sons ayera y awe, y mediado di gobierno Anselmo Pontilius a confirma cu sindicato FTA a pidi un investigacion riba e caso aki, segun e la splica NoticiaCla.com. A palabra tambe cu e negoshacionnan di CAO lo continua otro siman diahuebs. E schorsing tin di haber cu e ‘intercambio’ entre e trahadonan y e gerente e siman aki. Un di nan, ta debi na un carta na trahado, cu a sali den publicidad ayera.

MOTIBO DI SCHORSING

E suspension a wordo trata extensamente awe mainta, y e motibonan di e suspension ta varia. Sinembargo Pontilius no kier a bay den detayes riba e motibonan, comoquiera cu tin un investigacion andando. “Na momento cu e gerencia suspende e trahadonan cu pago, e ta pidi e tempo y trankilidad pa haci su investigacion, cual ta nan derecho” Pontilius a bisa. Como mediado di gobierno, a pidi pa acelera e proceso aki, pa por tin mas trankilidad. Pendiente esaki, e reunion ta continua otro siman.

E schorsing ta envolvi e discusion cu algun trahado tabatin cu e gerente di Ling & Sons. “Entre otro”, Pontilius a bisa. “Esey a bin dilanti. Pero segun e compania, tin mas asunto pa cual nos a bisa pa laga nos tende esey y si mester coopera, nos lo haci esey”, Pontilius a bisa. Coopera, den sentido di laga e investigacion continua sin cu ta mete y crea mas problema rond di esaki.

CAO

Pa loke ta e CAO, e motibo cu e reunion ta continua te otro siman diahuebs, ta pasobra cu mas hefe halto di e compania ta yega Aruba dialuna y kier mira e lugar y papia e dos dianan ey, pa despues continua cu e reunion. Tin chens cu e reunion por ‘reanuda’ diaranson caba. Pero esey no ta confirma. Mirando tur esaki, sindicato a bisa cu ta para tur accion pendiente e reunion di otro siman y e investigacion riba schorsing.