Ex diputado Dominico Tromp a bay sosega

ORANJESTAD – Ex diputado Dominico Tromp, miho conoci como Domi, a bay sosega diamars anochi. E curpa a bira malo dialuna, y diamars a bira un poco mas miho. Pero diripiente anochi esaki a cambia y a bay sosega, na su cas rondona pa su famianan. ‘Domi’ Tromp a nace dia 9 di December 1935 pues algun dia atras a cumpli 88 aña di edad. E tabata casa cu sra Yvonne Tromp-Frans y tabata tata di e.o. conocido politico y actual parlamentario Marisol Tromp y periodista Lelicia Tromp, y ta laga atras dos nieta Dominique y Marie Louise.  

POLITICA

Domi Tromp tabatin un carera como educador, esta docente na scol y tambe politico. E la milita den e partido PPA y a carga e funcion di diputado tambe. Fuera di esaki, e tabata fundador, presidente y actor di e grupo teatral Mascaruba. Na 1986, e la keda condecora como Officier in de orde van Oranje Nassau. 

Noticiacla ta manda palabra di forza na famianan di Dominico Tromp. Cu ‘Domi’ sosega na paz.