AH&SF a anuncia e lansamento di patruya di seguridad pa turismo

ORANJESTAD  – Aruba Hospitality & Security Foundation (AH&SF) dialuna a introduci su contribucion na e seguridad di residente y turista di Aruba den nos zonanan turistico, treciendo un presencia di seguridad cu ta dedica y visible, esta e 'Tourism Security Patrol Aruba' (TSPA). Funda na 2001 pa Aruba Hotel and Tourism Association (AHATA) den colaboracion cu Departamento di Polis, AH&SF a hunga un papel importante den apoya y promove seguridad den e areanan turistico y brinda un ambiente sano.

Actividad crucial di e patruya di seguridad pa turismo, esta e 'Tourism Security Patrol Aruba' ta inclui patruyamento activo, observacion preventivo, participacion cu comunidad, colaboracion cu autoridadnan local, respuesta na emergencia, y lo sirbi como un punto di informacion pa turistanan. E agentenan di patruya di seguridad a pasa un entrenamento riguroso pa mantene standarnan halto di integridad, cortesia y efectividad.

Toursim Security Patrol Aruba ta ranca sali enfocando su esfuersonan principalmente den e areanan di Palm Beach y Eagle Beach. E ploeg aki ta patruya primordialmente entre e playanan y e camindanan pa peaton dilanti e playanan. Asegurando un presencia di seguridad continuo y visibel ariba Palm Beach y Eagle Beach.

Tourism Security Patrol Aruba ta estableciendo e standard pa seguridad den industria di turismo. Cu un vision di mantene Aruba como un refugio sano pa turista y residentenan, e fundacion ta comprometi pa ta un forsa proactivo den apoya y promove seguridad den zonanan turistico di nos isla.

Awe ta introduci Tourism Security Patrol Aruba, dedica pa nos residente y turista por sigi disfruta di nos areanan turistico cu trankilidad. Pa mas informacion, por bai na www.tourismsecuritypatrol.com.