Van Huffelen: Aunke firma LAFt nobo, sin compromiso pa RAFt no tin interes abou

DEN HAAG/ORANJESTAD – Aunke cu Parlamento di Aruba pasa e ley ‘nobo’ di LAFt dialuna mes, ainda Aruba no ta cualifica pa bin na remarke pa e interes abou pa e refinanciamento. Esaki por compronde di e carta cu secretario di estado van Huffelen a manda pa Eerste Kamer riba un ‘update’ riba e situacion di RAFT. Awe mainta secretario di estado Hulandes Alexandra van Huffelen a confirma na Eerste Kamer den un actualisacion di asuntonan di Aruba, cu enberdad LAFT a bay Parlamento pa tratamento. “ Mientrasanto Aruba a ofrece e concepto aproba di e cambio di LAFt na Staten pa tratamento” Van Huffelen ta cuminsa bisa. Pero loke e ta sigui bisa, ta importante. “Mi ta ainda den combersacion cu Aruba pa cu e compromiso gubernamental” e mandatario ta sigui bisa. “ Pues ainda ARuba no a cumpli cu e condicion pa un interes abou” Van Huffelen ta sigui bisa den su carta. 

CONDICIONMas prome den e carta, van Huffelen ta bisa textualmente :” E percentahe di interes di Aruba por wordo baha, si un LAFT adapta (nobo:red) a drenta na vigor, y (Aruba:red) a duna un compromiso gubernamental pa yega na un trayecto pa un Rijkswet pa e supervision financiero”. Cu esaki e ta bisa pues cu e un, no por bay sin e otro. Y mirando cu den su carta fecha awe, 18 di December 2023, no tin un acuerdo ainda riba e otro. Pues si Parlamento a kere cu vota pa e LAFt pa awor ta suficiente y cu esaki ta duna nan (Aruba:red) e derecho pa bin na remarke pa e interes abou, esaki no ta e caso. Por lesa e carta di Van Huffelen AKI.