Salario minimo ta bira casi 2000 florin ora aña bolter

ORANJESTAD - Salario minimo ta bira casi 2000 florin ora aña bolter. Minister di labor Glenbert Croes a anuncia diabierna cu e salario minimo ta conoce un aumento di 92,80, y ta bira 1986,20. Awe diabiuerna 15 di december e minister a firma reglamento ministerial pa cu aumento di salario minimo entrante 1 di januari 2024.

AUMENTO SIGNIFICANTE

Un aumento significante di 4.9% cu ta yega te na e suma di AWG 1986,20 mensual, conforme conseho di DAO y SER. Na januari 2023 e mandatario a aumenta esaki na AWG 1893,40 y pa 1 januari 2024 e salario minimo ta aumenta cu 92,80 pa luna yega te 1986,20.

AUMENTA SALARIO MINIMO 4 BIAHA

Desde cu Minister Glenbert Croes ta e titular di Labor, cual cartera el a asumi 17 di november 2017, el a haya e salario minimo na 1711,15. Na 2019 Minister Glenbert Croes a aumenta esaki na 1762,48. Manera nos tur sa, 2020 COVID a dal na nos porta y gran parti di nos poblacion a perde trabou y comercio di Aruba a wordo afecta gravemente. Pues pa 2021, 2022 no tabatin espacio pa por introduci un aumento salarial. Pero ya entrante 1 di januari 2023 e mandatario a aumenta e salario minimo. Y awo pa 1 januari ta pa di 4 bes cu den su 6 aña como Minister cu e ta logra introduci un aumento cu apoyo unanime di Gabinete Wever Croes 2.

GRADICIMENTO PA SECTOR LABORAL

Aruba ta den un acenso economico danki na nos Turismo. Y e motor di nos turismo ta tur nos hendenan trahando den horeca cu merece e reconocimento di un aumento di e salario minimo como danki tambe pa nan empeño y servicio laboral.