Air Navigation Services Aruba (ANSA) y FTA a firma CAO nobo

ORANJESTAD - Awe den oranan dia mainta Air Navigation Services Aruba (ANSA) y Federacion di Trahadornan di Aruba a concretisa nan palabracionanan haci durante e negociacion di ultimo lunanan mediante firmamento di un acuerdo colectivo di trabao (CAO) cu duracion di 2 aña.

A haci varios ahuste tanto den beneficionan primario como secundario di e afiliadonan, manera ampliacion di e pagonan pa aniversario, aumento di e sumanan di aseguro di bista y di djente, etc. A acorda tambe algun bonus adicional cu e opcion pa esakinan wordo paga di forma contante y/of por medio di bononan.

FTA ta sumamente satisfecho cu e resultado y ademas ta orguyoso di por a firma su di 23 CAO pa aña 2023. Nos kier a duna un palabra di danki na gerencia di ANSA, nos team negociador y muy en especial na cada un di nos miembronan cu a sa di pone nan confianza y duna apoyo na nos organizacion pa por a yega na e CAO aki.