Aruba tin candidato pa forma parti di CAFT

ORANJESTAD – Pa fin di luna, Aruba mester conoce e miembronan di e College Aruba Financieel Toezicht. Pa fin di e luna aki (29 di mei) Rijksministerraad lo dicidi riba e miembronan sugeri. Esey ta nifica tambe cu Aruba mester ta cla e ora cu su candidato cu e lo sugeri na gobierno di Reino. Minister presidente Mike Eman a confirma esaki pa NoticiaCla.com. Ta bin un miembro apunta pa gobierno di Reino, uno di gobierno di Hulanda, y uno cu Aruba ta apunta. “E persona cu mester wordo apunta pa Aruba, ta wordo apunta pa gobierno di Aruba” Eman a continua bisando.

EVALUACION

Segun Eman, tin diferente nomber cu ta wordo evalua aworaki pa asina dentro di corto por tuma e decision tambe pa haci proposicion di e persona. Y segun e prome mandatario, tin cierto rekisito cu gobierno di Aruba mester tene su mes na dje. “E mester ta un accountant, e mester sa di cifra, e mester sa di finanzas publico, e mester sa di desaroyo social economico macro, pa por cumpli cu e necesidadnan tambe di con bo ta percura pa e economia di un pais por draai” Eman a continua bisando.

REINO TA DICIDI

Eman a confirma tambe cu Aruba ta meramente sugeri e candidato, pero ta keda na gobierno di Reino si nan ta bay di acuerdo cu e candidato. “Nos no ta kere cu e ta un tema hopi complica, despues cu gobierno a haci un bon seleccion di un persona di Aruba”. E tin diferente nombernan y ta premira cu ‘dentro di corto’ e nomber lo keda presenta. E hecho cu minister hulandes Plasterk a bisa siman pasa cu e ta premira cu fin di luna aki e asunto mester ta cla, ta cuadra segun minister Eman. “Corecto, corecto” e la contesta na final riba e tema aki.