A habri oportunidad pa aplica pa bira docter di cas na Aruba

ORANJESTAD - Minister di   Salud Publico sr. Dangui Oduber a anuncia cu tin oportunidad pa candidatonan cu BIG of AruBIG registratie aplica pa Huisartsenopleiding Aruba. Den un conferencia di prensa, Dokter Rajnherc di ImSan, a anuncia cu e vacatura pa e prestigioso “Huisartsenopleiding Aruba” cu ta acredita pa Amsterdam UMC lo ta buscando candidatonan entusiasma cu a completa nan estudio na Hulanda of cierto universidadnan den region, cu tin un titulo di “Master Degree” y cu ta cualifica pa tin un registracion di BIG of AruBIG. E persona ki lo tin e oportunidad aplica pa cuminsa e opleiding for di 1 di Augustus 2024 como AIOS (Arts in Opleiding tot Specialist) pa asina specialisa nan mes durante 3 aña pa bira dokter di cas aki na Aruba. 

E Huisartsenopleiding Aruba a cuminsa na 2009 cu e meta di reforsa e “eerstelijnszorg’ aki na Aruba. E opleiding ta keda organisa door di Huisartsenopleiding Amsterdam UMC conhunto cu Departamento di Salubridad Publico di Aruba (DVG) y Huisartsen Vereniging Aruba (HAVA) y ta wordo acomoda na nos hospital “Instituto Medico San Nicolas” (ImSan).