HAVA, ASHA Y AZV a firma acuerdo di cooperacion pa fortifica sector di cuido

ORANJESTAD - Minister di Salud Publico sr. Dangui Oduber  anuncia cu a firma un acuerdo den un manera di “samenwerkingsovereenkomst” entre Stichting Huisartsenvereniging Aruba (HAVA), Asociacion di Specialista Hospital di Aruba (ASHA) y Algemene Ziektekosten Verzekering (AZV) pa por sigui fortifica e sector di cuido na Aruba. Director di AZV, sr. Edwin Jacobs a hiba algun palabra den nomber di Ministerio di Salud Publico, tocante e acuerdo “zorgakkoord” cu na Juli 2023 a cera entre tur e “stakeholders” pa enfoka mas ariba tur e areanan di cuido cu lo mester wordo fortifica durante e proximo añanan. Ademas di esaki mester sigui percura cu sector di cuido por keda financieramente pagabel y cu por sirbi cu e demanda. 

Den cuadro di esaki Dokter van Trigt tambe a hiba algun palabra pa expresa su bon contento pa e colaboracion entre tur e stakeholders nan pa mantene e calidad di cuido halto na Aruba. Durante e ultimo añanan tabata tin hopi mehoracion y ta sumamente importante pa sigui evalua y sinta hunto pa percura pa bin cu solucionan ariba tur e puntonan dificil pa yega na un cuido cu ta mas accesibel, mas eficiente y menos costoso pa nos pais aruba. Despues Dokter Randall Leong tambe a comparti cu e ta positivo cu e acuerdo aki lo bay trece oportunidadnan nobo pa asina por sigui mehora nos sistema di cuido na Aruba.