Na Corsou, parlamentario di partido MFK Amerigo Thode a fayece

WILLEMSTAD - Den oranan di mainta a drenta informashon ku Amerigo Thode, parlamentario pa partido MFK, a fayesé. Pa partido MFK esaki ta un pèrdida sensibel. E partido asta a prepará pa dun’e un rekonosementu na bida, pero lamentablemente el a bira mas malu nèt un dia promé loke a pone ku awor e rekonosementu lo sosodé mas despues den presensia di su famia. 

Van Heydoorn ta den eksterior atendiendo un biahe di trabou komo minister di Enseñansa, Siensia, Kultura i Deporte. Den su promé palabranan e presidente di MFK a duna di konosé ku e morto di Amerigo Thode ta un pèrdida ku ta afektá e organisashon polítiko. ‘Amerigo tabata e promé presidente di MFK for di 2010 te 2014-2015. E tabata un di e analistanan polítiko mas mihó ku MFK tabatin, ademas semper e ta un persona bon dokumentá. Semper ku partido tin mester di un informashon por a pidié i Amerigo ta kumpli. Ki ora ku mester bai bek den pasado ku informashon pa tuma desishon semper e tabata dispone di esakinan”.

E presidente di MFK a sigui bisa ku ku e ta korda ku na 2020, ora nan tabata preparando pa traha lista, i ya kaba tabatin sierto indikashon di malesa ounke no tabata sa muchu bon ta kiko, a pidi Amerigo pa karga e lista teniendo kuenta ku su situashon di salu. ‘Su deseo ferviente tabata di por a sirbi un periodo mas komo parlamentario i partido a trata na akomodé, pero no a logra pon’e den e promé 10 nan. Di tur manera a logra ku el a drenta Parlamento i awor a fayesé komo miembro di Parlamento.”

A prepará rekonosementu pe na bida pero a sosodé otro

Manera indiká ya kaba MFK a prepará pa duna rekonosementu den forma di nombra e sala di reunion den nan sede na su nòmber. A plania pa dun’e e rekonosementu riba un djadumingu, pero nèt e djasabra promé el a bira malu. Ta nifiká ku despues lo rindi homenahe na Thode den presensia di su famia. NOTA: Texto ta scirbi den Papiamento fonetico di Corsou.