Van Huffelen ta conta cu premier Wever lo ‘utilisa’ tur su sabiduria pa tuma miho decision

DEN HAAG – Reaccionando diahuebs riba e comentario di prome minister Wever, cu a bisa e siman aki cu ‘porta secretario di estado Hulandes van Huffelen no ta ‘domina’ e materia di LAFt’, e secretario Hulandes a bisa Noticiacla cu e ‘ta conta cu prome minister di Aruba lo utiliza tur su sabiduria pa tuma e miho decision pa residentenan di Aruba den e temponan nos dilanti y cu e lo sa di mantene un bon relacion cu Hulanda’. E no a reacciona directamente asina riba e comentario di prome mandatario Wever den direccion di van Huffelen.

FILOSOFIA DI OBAMA?

No reaccionando directamente riba e comentario di Wever, cu ta sugeri cu e mandatario Hulandes no conoce e materia di LAFt. A pone algun hasta considera esaki como igual na e tactica aplica pa ex prome dama di Merca, Michelle Obama. Obama durante un di su discursonan algun aña pasa a haya hopi popularidad pa a usa e dicho ‘‘when they go low, we go high’, refiriendo na e hecho cu ora cu hende baha di nivel, nan si ta keda na un nivel halto. Ta conoci cu e declaracionan recien di secretario di estado van Huffelen na Noticiacla den un programa siman pasa, den direccion di prome minister y minister Maduro recien riba e tema di sclavitud y referencia di supuesto colonialismo, ta confirma y resalta cu e no a aprecia esaki ningun tiki di parti di gobernantenan di Aruba. E la reacciona basta preocupa y cu e tipo di gritonan asina sigur no ta yuda e causa. 

LESA MEI MEI DI E LIÑANAN

Na Hulandes tin un dicho ta bisa, ‘tussen de regels lezen’, cu algun a bisa cu, cu e declaracion ultimo di e mandatario Hulandes, mester haci exactamente esaki. Esta cu si lesa e mensahe ultimo aki di van Huffelen, por interprete cu ‘tuma e decision corecto, pa bo mantene e relacion cu nos bon, sino tin problema’.