Na Hulanda ta sospecha homber cu ta papia papiamentu di a hinca Juny di Arnhem mata

NIJMEGEN - Polis na Nijmegen ta buskando tres sospechoso ku mester ta kousante di morto di e hòmber Antiano Mirojuni Andres Cicilia alias Juny di Arnhem. Un dje sospechosonan lo mester ta un hòmber koló skur i posiblemente ta papia Papiamentu. Esaki ta loke ku medionan hulandes ta indiká. Djadumingu nochi lat, Juny di 38 aña di Arnhem a haña algun hinka ku a kaba ku su bida durante un bringamentu ku tabatin na Couwenbergstraat den Nijmegen. E víktima a fayesé di su heridanan den hospital. Su tata di 61 aña tambe a keda heridá durante di e bringamentu.

Den kareda di 19:15 ora di Hulanda djadumingu, polis a haña mèldu ku mester tin un bringamentu pisá na e sentro di kompra Hatert na Nijmegen. Juny tabata kana huntu ku su tata i un ruman hòmber chikí den Couwenbergstraat ora nan a haña den den un konflikto ku un hòmber i un hende muhé ku tabata kore den un outo chikí i kolo skur. Djis despues ku e bringamentu a start, un otro hòmber tambe a yega aserka i e muhé. Durante e bringamentu, klapnan a kai. E bringamentu a tuma lugá riba via públiko bou di wowo di diferente testigu i a finalisá ku e insidente kaminda a hinka Juny vários biaha. Despues dje insidente aki, e dos hòmber i e muhé a kore bai den e outo pretu chikí den direkshon di Blankenborgstraat. Ta sospechá ku e outo pretu chikí lo mester ta un Volkswagen Polo.

Juny a keda transportá pa hospital den situashon kritiko, pero ta fayesé debí na e heridanan grave ku el a risibí. Su tata di 61 aña di Oosterbeek tambe a resultá herida i a bai hospital. Debí ku tabatin maltrato di ámbos banda, e tata di 61 aña i e ruman hòmber chikí di 34 aña di Juny, a keda detené djaluna. Nan no ta keda sospecha di hinkamentu. Un famia a bisa medionan di komunikashon ku e tata i su dos yunan a bai e sentro komersial despues di a kaba di yuda un amiga ku fèrfmentu i pega laminat den un kas nobo. Den e programa di polis “Opsporings Verzocht” ku ta pasa na Hulanda ayera nochi, a mustra imágen di e bringamentu ku a keda kapta pa kámaranan den bisindario i tambe un hòmber kolo skur ku lo ta papia Papiamentu komo un dje sospechosonan. Tambe tin un hende muhé mas delegá i un otro hòmber ku durante e bringamentu a kore yega na karson kòrtiku. Polis ta pidi tur esnan ku konosé e personanan aki pa mèldu na polis i tambe pa manda tur otro imágen di kámara dje insidente ku hende tin pa nan. Pasobra ta trata di un insidente basta pisa. NOTA: Texto ta scirbi den Papiamento fonetico di Corsou.