Bermudez: Lo tuma cualkier extra comentario di CFT na cuenta

ORANJESTAD – Mientras cu e presupuesto 2015 ta aproba y den pleno ehecucion, ‘den espirito di e protocol’ minister Angel Bermudez ta bay pidi College Financieel Toezicht pa evalua e presupuesto ‘nobo’ aki pe. E mandatario ta desmenti asina cu e presupuesto ‘automaticamente’ ta bay CFT pa ‘controle’. Asina e mandatario a sigura NoticiaCla.com awe tardi. Segun e mandatario, si tin comentario extra di CFT, lo tuma esaki na cuenta y wak ki momento ta oportuno pa implementa esakinan. E mandatario ta referi na e presupuesto ‘diferente’ basa riba e dos amiendanan cu a pasa den parlamento, a haya un otro ‘contenido’ compara cu esun cu CFT a evalua na december.

AUTOMATICAMENTE

Cu esaki, e mandatario ta desmenti cu e presupuesto ainda no ta cla y cu e mester a bay ‘automaticamente’ pa CFT ora cu gobernador a caba firmele. E protocol firma di dia 2 di mei ta mustra cu si gobierno no cumpli cu e comentario y sugerencia, cu CFT por acudi na Rijksministerraad pa nan actua. Segun Bermudez, CFT por duna conseho, durante ‘curso di ehecucion di e presupuesto’ y cu gobierno lo tene su mes na esey. Bermudez ta interpreta esaki pues diferente, unda cu protocol ta papia cu e gobierno mester adapta e presupuesto despues cu e la wordo aproba, y pasa pa CFT. Si esaki no sosode, Hulanda ta cay aden.

ADAPTA NA CAMINDA

Bermudez a compara e hecho cu na Hulanda tin dos momento cu un presupuesto ta wordo ehecuta y evalua y adapta si ta necesario. Esey ta den e voorjaars nota y e najaars nota. “Nos no tin esey na Aruba. Pero nos ta haya ta apropia cu den curso di e aña aki, wordo identifica manera cu e presupuesto no ta bay resulta den e deficit cu a haya aproba pa parlamento, e ora ey nos mester interveni y cambia y a adapta e presupuesto”. Cu esey e mandatario ta mustra cu lo ta dispuesto pa cambia e presupuesto, durante, y no awor mesora.