Na Corsou a instala Jair Tromp di Aruba como comandante nobo di bombero

WILLEMSTAD - Ayera a instalá di forma ofisial un komandante nobo pa brantwer den persona di ir. Jair Tromp. For di òktober sr. Tromp a kuminsá laborá. Sr. Tromp tabata komandante di brantwer na islanan BES pa 7 aña largu.

Na okashon aki, minister di hustisia Shalten Hato a duna di konosé ku a pone e funshon di komandante di brantwer Kòrsou komo un kritiko, mirando ku e echo ku un organisashon asina importante pa pais ku ta sòru 24/7 pa seguridat mester, tin un hende ku ta guia Brantwer. P’esei riba su proposishon na gabinete Pisas II, por a habri e vakatura di komandante di brantwer Kòrsou i pa yen’e komo prioridat den ministerio di hustisia. A haña un komandante nobo ku un “bagage” amplio i eksperensia tur afó, di akuerdo ku minister Hato. Jair Tromp a keda eligí komo e komandante di brantwer Kòrsou dia 16 di òktober último, pa den e funshon aki e guiá i liderá e kuerpo di bombero. Sr. Tromp a studia aki na Kòrsou na UNA i biba un periodo basta largu aki na Kòrsou. Den pasado señor Tromp a forma parti di Brantwer Aruba. Algun aña atras sr. Tromp a fungi komo Komandante General di kuerponan di Brantwer na islanan BES. Komo Minister, pa algun tempu kaba nos a inisiá ku un plan di implementashon pa kambionan struktural den Brantwer Kòrsou. E servisio di bombero ta masha importante den komunidat di Kòrsou. P’esei resientemente el a pasa kasi henter un dia na brantwer pa sera konosí ku e personal. E ta kere ku komo un mandatario no por sinta den toren dirigí, mester baha bin abou wak kiko e personal falta pa nan por sigui funshoná. A base di e rekorido ku minister Hato a haña na brantwer, el a kuminsá pensa kon por traha riba un pòst pa e área di Banda Riba. Ya kaba esaki ta un dje tareanan ku komandante tin pa hasi, esta start un investigashon pa wak si por bai realoká e pòstnan òf un nobo pa área di Banda Riba tambe.

Komo komandante nobo, sr. Tromp entre otro lo mester sòru pa implementashon di e asina yamá “Plan di Fortifikashon Brantwer” (Verstevigingsplan Brandweer) kual trayekto lo atendé e diferente área di atenshon, manera: Organisashon i funshon, Areglo di posishon hurídiko, Sistema di formashon profeshonal, Lei i regla, Plan di komunikashon interno i eksterno. Loke ku semper minister Hato a atmirá di brantwer ta e forma kon ta komuniká ku komunidat. Brantwer por sirbi komo ehèmpel pa otro organisashonnan gubernamental kon pa profilá riba medionan di komunikashon. Semper komunidat por mira e trabou ku brantwer ta desplegá.Mas aleu minister Hato ta elogiá ku komandante di brantwer sr. Tromp ta emití tur siman un resúmen pa komuniká ku koleganan i ta informá nan di loke a pasa den siman. E tipo di komunikashon interno i eksterno ta sumamente importante pa desaroyo di un organisashon. Próksimamente lo atendé ku un plan di mas aña den kual lo atendé edifisio, plan struktural pa brantwer, i tur esaki ta riba un término mas largu. E ta kontentu di por a duna restrukturashon na brantwer Kòrsou pa huntu ku mando di brantwer pa yega na akshonnan konkreto i pa fortifiká brantwer den vários aspekto. Huntu ku union por halsa kalidat di e kuerpo, minister Hato a terminá bisando. NOTA: Texto ta scirbi den Papiamento fonetico di Corsou.