Soto: Lo forma comision pa evalua asunto di RHD mas extenso

ORANJESTAD – Gobierno hunto cu e representantenan di e grupo di doño di auto RHD (right hand drivers) lo reuni proximamente y evalua tur punto extensamente, prome cu yega na un decision final. E persona na cabes di e grupo di RHD, Cristian Soto-Garcia, a sigura NoticiaCla.com awe merdia cu e la logra su meta, esta hala atencion di minister, riba e tema. E mensahe segun Soto, ta cu tin hopi hende tras di e asunto aki, y cu no por trece cambio ‘sin mas’ sin tene cuente cu e mayoria.

COMISION MAS GRANDI

Soto a confirma cu e la reuni awe mainta cu minister di husticia Arthur Dowers, y a dicidi cu dialuna lo papia extensamente di tur e pro’s y con’s di e asunto. Entre nan e infrastructura cu no ta apto pa e autonan. Mirando con extenso e asunto ta, a dicidi pues pa miho continua dialuna y yega na un acuerdo pa bin un comision cu ta pasa via minister y ta bin cu hende di gobierno, y di banda di e grupo cu ta core RHD, y tambe hendenan legal pa tuma decisionnan despues. Soto a bisa cu nan meta ta pa bin cu un comision cu ta papia riba e totalidad di nos trafico relaciona cue autonan aki.