Na Corsou, Cft kier mas informacion riba desicion di gobierno pa cumpra Campo Alegre

WILLEMSTAD - Kolegio Supervishon Finansiero, Cft ke mas informashon riba e invershon di gobièrnu di Kòrsou den Campo Alegre. Segun e kuenta anual 2022 den konsepto a pone 7 mion florin riba presupuesto di kapital disponibel pa kompra di e edifisionan. Esaki miéntras ku riba presupuesto 2022 e invershon aki no tabata menshoná.

Cft ta mira riba e relato finansiero di e di 3 kuartal di 2023 ku gobièrnu di Kòrsou a pone 1 mion mas disponibel pa kompra di Campo Alegre. Pa e motibu aki Cft ta deseá di haña mas informashon di gobièrnu riba e kompra.

Gobièrnu di Kòrsou a empoderá promé minister, Gilmar Pisas pa partisipá na e findishi di Campo Alegre dia 26 sèptèmber último. Gobièrnu a gana e findishi kumprando 3 parsela riba e terenonan di Cunucu Hatun i Seru Fortuna formando un solo propiedat pagando un suma di 8 mion florin.

Pisas den un promé reakshon a bisa bon kla ku gobièrnu di Kòrsou a kumpra e edifisio, pero ku esei no ta nifiká ku ta Campo Alegre ta bai habri bèk komo sentro di prostitushon. E fondonan ku a usa pa kumpra e propiedat a sali di ministerio di finansa pa fondo di kriminalidat den ministerio di hustisia.

Pisas a duna di konosé mas aleu ku ya kaba a hiba kombersashon ku Konseho di Iglesia i otro gruponan di interes pa wak ki direkshon ta bai ku e edifisio di Campo. E edifisio por haña diferente destinashon. Gobièrnu di Kòrsou a opta pa hasi e invershon aki mirando ku e riesgonan ta limitá i ku e benefisionan ta mas importante.

Segun gobièrnu tur konseho solisitá tabata positivo. E propiedat ta brinda oportunidat pa diferente proyekto dependiendo di e maneho ku Gobièrnu di Kòrsou ke implementá. Entre otro por usa e propiedat komo un sentro kaminda por risibí hendenan den nesesidat pa tratamentu spesífiko. Tambe por us’é pa proyektonan ku ta ligá ku fasilidatnan rondó di aeropuerto òf e por fungi komo un establesimentu turístiko.

Otro opshon ta ku e propiedat por fungi komo un sentro multifunshonal. Tambe e propiedat por sirbi pa ofresé dak na personanan ku mester di esaki i/òf komo shèlter òf e por sigui mantené e mesun meta ku e tabatin último dékadanan;

Pa por yega na e mihó maneho posibel Gobièrnu di Kòrsou a bisa di lo instituí un komishon miksto, pa asina yega na e mihó estilo di eksplotashon di e propiedat aki ku a bira awor parti di propiedat di pais. Opinion general den komunidat ta sinembargo ku gobièrnu mes no por ta den negoshi di prostitushon ni tampoko por ta fasilitá otronan pa hasi e negoshi di prostitushon.

Preteksto ku mester di un Campo Alegre pa frena malesanan genériko di plama òf pa evitá ku hendenan lokal ta kai den prostitushon òf pasobra Campo Alegre ta kontribuí na turismo i desaroyo ekonómiko no ta válido. Asina personanan sumamente preokupá pa e intenshonnan di gobièrnu pa kumpra e propiedat i fasilitá otronan pa habri un sentro di prostitushon atrobe, ta bisa.Mas motibu ku ta menshoná ku gobièrnu no mester ta envolví direktamente ni indirektamente den prostitushon ta e aktividatnan ilegal ku e mundu di prostitushon ta atraé. E mundu aki ta unu duru. Hopi biaha ta mira ku ta sierto hende ta envolví den e mundu aki i ku e aktividat di prostitushon ta yama otro aktividat ilegal manera droga, arma, trafikashon di hende òf negoshi den hende.“Campo Alegre mes tabata eksigí e damanan ku ta keda ei den ku nan no por sali durante sierto orario durante di dia. Esaki ta enserá ku ta priva hende di nan libertat. Komo gobièrnu bo no por ta di niun forma envolví den tipo di práktikanan aki. Gobièrnu mester ta hustamente esun ku ta kontrolá i aktua kontra e aktonan aki.” NOTA: E texto ta scirbi den Papiamento fonetico di Corsou.