Lider di MEP a tene exposicion di pintura riba su cumpleaños pa un bon causa

ORANJESTAD - Lider di MEP Evelyn Wever Croes a tene exposicion di pintura riba su cumpleaños pa un bon causa . Meta pa recauda fondo pa alegra Pasco di algun famia a wordo realisa y e benta a sold out. Transformando e ocacion den un evento diferente, Lider di MEP a organisa un ‘Mini’ Expo titula ‘Relaha y Recarga’, di su pinturanan cu el a bin ta trahando riba nan den e ultimo aña aki cu hopi creatividad y dedicacion, alehando asina su mente di e trabounan duro. 

Loke a haci e celebracion aki berdaderamento uno special y bunita, tawata e meta tras di dje. E ganashi di benta di tur pintura ta wordo destina pa un bunita causa, pa trece un poco di alegria na algun famia den e temporada di fiesta aki, un temporada di aña pa duna, gradici y haci impacto significante den bida di otro.

E sala di Cede di MEP a wordo transforma, exponiendo cada cuadra di Lider di MEP door di señor Tito Bolivar cu tin un experticio amplio den organisa exposicionnan di arte. Señor Bolivar ta Director di ArtisA, y a produci hopi proyecto relaciona cu arte, entre otro Aruba Art Fair. Señor Bolivar a wordo asisti door di su mama señora Diana Croes.

Expresando su gratitud, Lider di MEP a extende un danki di curason na tur esnan cu a yuda pa haci e Expo un exito y crea un cambio positivo pa recauda fondo pa asina e fin di aña aki, por alegra Pasco un poco pa algun famia den nos comunidad. Un danki na cada ciudadano cu a cumpra un obra di arte y asina contribui na un bunita causa. 

“Danki na cada un cu a bishita e Expo ‘Relaha y Recarga’ y celebra asina mi fecha natal. Danki na tur cu a haya oportunidad pa cumpra un cuadra mas na nan gusto. Mi conseho na cada ciudadano di nos pais ta pa haci un hobby cu ta relaha bo y recarga bo cu energia pa sigui traha y logra metanan grandi”, Lider di MEP a expresa.