Pontilius: Referendum pa trahadonan RIU Palace otro luna

ORANJESTAD – Tin un peticion di sindicato FTA (Federacion di Trahadonan Arubano) , pa mediado di gobierno tene referendum pa e hotel Riu Palace. Mediado di gobierno Anselmo Pontilius a confirma na NoticiaCla.com cu a reuni caba na varios occasion cu e representantenan di FTA y di Riu Palace y gerencia. A palabra fecha pa 5 di juni 2015 pa esaki tuma lugar. Mes momento a confirma cu a trata e asunto interno laboral, unda cu lo tin tension pa motibo di intimidacion ora cu e trahadonan a acerca e sindicato menciona. Segun Pontilius, a pidi pa tur trahado keda trankil, pendiente e resultado di e referendum pa e departamento di F&B (bar), housekeeping y maintenance.

CONFRONTACION

E hotel ultimo tempo tabatin problema debi na confrontacion entre gerencia y personal di e.o. housekeeping. Fuentenan fidedigno di NoticiaCla.com a splica cu ta trata aki di cierto personanan den housekeeping cu lo ta orchestra e confrontacion aki. Di otro banda, a compronde cu e contra partido tambe ta bin cu mesun acusacion. Na varios occasion tabatin welganan ‘chikito’ pa mustra malcontento.

RENOBACION

E hotel actualmente ta sera pa renobacion, y un parti di e personal a bay cas, otronan a wordo traslada pa e parti di e hotel ‘ruman’ esta Riu Antillas. Aki tambe tabatin basta problema mirando con e traslado aki a bay. No ta tur hende a keda contento cu e proceso, y tin duda ora cu e Palace habri atrobe aki dos pa tres luna, kennan tur lo por bay bek, y ken por haya trabou atrobe na e hotel.