Mediador: Comportacion gerente por a afecta negoshacion CAO

ORANJESTAD – Diabierna mainta mediado di gobierno Anselmo Pontilius lo reuni cu tanto gerencia di Ling & Sons y sindicato pa yega na un acuerdo di con pa sigui trata e contracto colectivo y mes momento conseha ki caminda pa cana riba e situacion interno di e empresa. Esey Pontilius a confirma na NoticiaCla.com awe tardi.

ACTUACION GERENCIA

E actuacion di e gerente contra e trahadonan, a keda trata awe caba, y a wordo mustra cu mester drecha esaki pa buena marcha di e compania. Di parti di gerencia a acepta cu e actitud no tabata por. E hecho ta cu ta para dilanti un situacion unda cu partido tin cu haya otro, y cu e comportacion di hende, por influencia esaki. Hende ta keda hende y como tal e aire malo cu tin despues cu e gerente a grita su trahadonan, ta keda reina. “Tur hende mester sa cu loke a pasa, no por y lo busca un formula pa trata cu otro di un forma mas humano” Pontilius a sigui bisa.

RESOLVE PROBLEMA

Pontilius ta confia cu partidonan por sali for di e asunto di contracto colectivo diabierna mainta, pasobra ‘ya nan tabata negoshando e contracto colectivo’. Gran parti di e contracto nan a papia y haya otro ariba caba, y ta apenas algun parti tin diferencia ariba. Ta papia di 2 articulo. Y tambe lo papia riba e maneho di personal hunto cu herencia. “Algo cu partidonan mes tin cu mira con nan ta bay deal cune y percura pa preveni e tipo di confrontacionnan aki”. E ta premira un solucion sigur.