Trahadonan di Ling & Sons riba standby pa accion atrobe

ORANJESTAD – Awe mainta e accion di e delegadonan di congreso di sindicato FTA, tabata pa ta solidario na trahadonan di e supermercado Ling & Sons. “Na momento cu nos a nota cu gerencia, yuda pa nos propio hendenan, a saca carta pa saca e trahadonan for di e sindicato, a conduci cu congreso a dicidi pa sostene e clase trahado”. Asina e presidente saliente Rudy Geerman a bisa NoticiaCla.com awe mainta.

MENSAHE PA STOP

A logra te cu ayera, pa saca 10 trahado for di e sindicato. Pero e accion di awe mainta, ta un mensahe pa nan, pa nan stop e practica aki. “Nos ta convenci cu na final di dia, nos por logra esaki, esta e 10 trahadonan” Geerman a bisa. E trahadonan mes di e supermercado, ta trahando normal, aunke a wordo atendi si pa e sindicato den forma di sosten moral.

REUNION TA DETERMINANTE

E siguiente paso segun Geerman, ta cu si gerencia no cambia su actitud, e accion lo acelera y nan ta protesta. Tin un mediado di gobierno cu lo yama un reunion entre e partidonan concerni, pa reuni. Depende di e reunion cu mediado, lo sa kico ta e siguiente paso.