Hepple: AHATA ta rabia cu Elmar no a cumpli

ORANJESTAD – E asociacion hotelero AHATA (Aruba Hotel and Tourism Association) ta rabia cu e compania di electricidad Elmar. Segun e CEO di AHATA James Hepple, nan tin 3 aña ta warda riba e compania pa reduccion di tarifa di coriente manera priminti pa gobierno. Y tres aña mas leeuw, e mesun contesta nan ta haya cu ta ‘mayan.. mayan’. AHATA no ta dispuesto pa warda mas y a pone e ultimatum pa zomer awor e asunto mester ta atendi.

ACUERDO

Segun Hepple, ta na 2012 ora cu e tarifa di awa a baha y esun di coriente a aumenta, despues di acuerdonan na un dialogo social, cu AHATA a wordo priminti cu lo atende nan precupacion di tarifa halto di coriente. Pa hotelnan, nan ta wordo cobra un tarifa basa riba proyeccion/estimacion di coriente enves di e tarifa real. “E tempo ey nos a bay di acuerdo cu e aumento di tarifa general, contal cu nan (gobierno) bay di acuerdo pa determina e tarifanan corecto. Gobierno a haci un promesa cu nan lo a haci e cambio” Hepple ta sigui bisa. Algo cu tres aña despues, ainda no a sosode. Y cu e prijs di coriente ainda halto, nan no ta nada contento.

SINTA CU GOBIERNO

Den nan intento pa resolve e asunto, Hepple a sigura cu nan a sinta cu gobierno, cu Elmar y mas hende. E tin comprension pa e situacion cu e modelo di electricidad ta cambiando. Mas energia alternativa sostenibel wordo uza pa e consumidor, menos entrada e companianan di utilidad ta haya. Ademas, no ta cu nan no a haya contacto. “Nos ta papia cu nan, pero nada no ta pasa. E contesta ora cu nos papia cu nan, semper ta ‘mayan, mayan’. E cos ta tardando demasiado, siendo cu e ta un componente asina importante di e gasto di operacion. Otro gastonan ta aumenta, y como tal ta purba ahusta cierto area. Como tal nan kier purba wak si nan por ahusta esaki, pero e no ta logrando. Gobierno ta dispuesto, y a duna atencion. “Nos a sinta cu prome minister, minister di utilidad, Frank Hoevertz y otronan. Pero simplemente ningun hende no ta actuando” Hepple ta sigui bisa. “E ta algo frustrante”.

E ta yegando na un punto cu ta pone cu AHATA no kier participa mas na dialogo social, pasobra no tin sentido. “Ki bal participa, pero si tin acuerdo, e mester wordo honra”.

MENOS INVERSION

Si nan bisa cu hotelnan ta gana hopi placa, pues nan mester por carga e gastonan, ta un pensamento eroneo segun Hepple. E no ta cuestion di esey. E ta un cuestion di acumulacion di aumento di varios tipo di gasto. E strategia cu tur hende a bay di acuerdo, segun Hepple, ta cu mester trece un clientela di nivel mas halto. Esey ta nifica mas inversion, y pa haci esey, mester genera entrada. Y mas entrada cu uza pa paga gasto, ta keda menos pa inverti, Hepple a finalisa bisando.