Vrolijk: Ta den man di gobierno mes, si e LAFt ‘nobo’ ta keda aproba na tempo

ORANJESTAD – Tur cos ta den man di gobierno di Aruba si ta keda cla cu e ley di LAFt, prome cu fin di aña, cumpliendo asina cu exigencia di gobierno Hulandes. Asina presidente di Parlamento Edgard Vrolijk a bisa noticiacla.com diahuebs mainta. E presidente a confirma cu awe a fiha fecha pa parlamentarionan hasi pregunta riba presupuesto supletorio y e cambio di LAFt. “ Despues di e fase ey e ta den man di gobierno” Vrolijk a bisa. Cu esey e kier men cu ta keda na gobierno pa entrega nan NAV, cu ta e contestacion di e preguntanan di e parlamentarionan. Den terminologia politico esaki ta e NAV, e ‘Nota naar Aanleiding van het Verslag.

SI GOBIERNO ENTREGA E NAV NA TEMPO

Segun Vrolijk, si gobierno hasi esaki na tempo, esta entrega e contestanan na tempo, Parlamento na su turno lo por atende e LAFt ainda prome cu reces, cu ta cuminsa dia 20 di December proximo.

FECHA TE OTRO SIMAN 

E presidente di Parlamento a informa parlamentarionan awe cu nan tin te dia 8 di December awor pa hasi pregunta riba e LAFt. “Y e ora gobierno tin di contesta. Y si e keda cla lo agendeer esaki prome cu reces” Vrolijk a bisa. Segun e presidente, nan tin tempo pa haal e paso Vrolijk a bisa cu e ley riba su mes ta paar di cambio so e tin, cu ya ta trahando den protocol y ta conoci caba tambe den e concepto di RAFt y sigur ta ancra cu no mag hasi PPP, cu ta un di e cambionan cu a bin acerca di Hulanda recientemente. Pues, palabra ta keda na gobierno mes si e LAFt ta keda cla na tempo.