Na Corsou detenido kier a comete suicidio den cel sperando transporte pa SDKK

Na Corsou detenido kier a comete suicidio den cel sperando transporte pa SDKK

Posted on 11/30/2023 8:48 am AST | Updated on 11/30/2023 8:48 am AST

WILLEMSTAD - Ayera miembronan di LBD ku ta mantené órden públiko na Kas di Korte i tambe ku ta atendé ku detenidonan, a yama nan miembronan di sindikato Straf i NAPB, despues ku un detenido a sali fo’i tratamentu di su kaso i a trata na kometé suisidio.

E miembronan di LBD atento a tuma nota ku e detenido ku tabata wardando pa keda transportá bèk pa prizòn, a sker su paña i a kuminsá traha lapinan pega na otro ku ménos bon intenshon.

Mesora e miembronan di LBD a bati alarma pa evitá lo pió.

Esaki pa nan tabata e gota den e hèmber, pa motibu ku nan ta di opinion ku ora e detenido kaba ku su kaso e mester keda transportá mesora bèk pa prizòn SDKK i no por warda hopi manera ta e kaso aktualmente. Tur esaki pa evitá kasonan manera a sosodé ayera.

Na vários okashon e detenido mester warda te ora kaso di otro detenido terminá, pa asina e keda transportá bèk pa prizòn.

Parse ku na vários okashon e detenidonan ta reklamá ku nan tin hamber, ta kansá òf tin soño, dor di warda asina tantu ora, pa keda transportá bèk. Esaki ta bini pa falta di transporte pa detenidonan. Miembronan di LBD tin hopi tempu ta boga pa un transporte spesial na Kas di korte pa por atendé ku e detenidonan di un forma mas diligente.

Debí na e falta di transporte, mester warda e transporte sali fo’i Barber pa buska e detenido di kual esaki sigur ta tuma su tempu. Vários miembro di sindikato a presentá ayera na Kas di Korte kaminda nan a reuní i wak e situashon kon pa trese un solushon. NOTA: Texto ta scirbi den Papiamento fonetico di Corsou. 

  • Powered by SETAR