Gobierno di Aruba a manda e ley di LAFt pa Parlamento

ORANJESTAD – A dura un poco, pero finalmente gobierno di Aruba a confirma diaranson cu nan a keda cla cu e concepto di ley di LAFt, despues cu Hulanda a informa di esaki for di diabierna siman pasa. Segun un comunicado di gobierno nan ta bisa cu despues di e deliberacionnan cu Hulanda durante e ultimo simannan, manera a keda aproba den Conseho di Minister di Reino di dia 27 di October ultimo, Aruba y Hulanda a yega na acuerdo riba e cambionan di LAft. LAft ta e Ley di Supervision Financiero cu ta duna e cuadro legal na e CAft pa haci trabou di supervision finaciero na Aruba. E ley di LAft aki tawata anticua y no tawata contene e normanan recien. Cu e cambionan cu a wordo presenta awe na Parlamento, e normanan ta actualisa. 

TRES NORMA:

Prome Minister Evelyn Wever-Croes a duna di conoce cu Aruba ta bay di un norma pa tres norma cu ta inclui den e cambio di ley aki. E prome norma ta cu Aruba mester un surplus di por lo menos 1% tur aña. E di dos norma, e gastonan di personal no por surpasa e 10% di GDP anual, cual ta un meta cu mester logra pa aña 2027. E di tres norma, e percentahe di debe di pais Aruba den GDP mester yega na 50% na aña 2040. 

“Tur tres norma ta normanan realistico y ya caba Gobierno di Aruba ta trahando riba nan desde aña 2017 cu Gabinete Wever-Croes I a drenta den Gobierno y lo continua traha den e direccion aki. Cu esaki ta trece Aruba riba nivel di finansas publico sostenibel”, Prome Minister a enfatisa. 

TRES CONDICION ULTIMO MOMENTO:

Minister President, un luna pasa a indica cu Hulanda na ultimo momento a bin cu tres condicion cu tawata tin di haber cu e proyectonan PPP. (Proyectonan Private Public Partnership). Hulanda kier pa Aruba prohibi e proyectonan aki completamente, mirando cu e discionnan di e Gabinete Mike Eman a tuma pa cu e proyectonan PPP, a causa Aruba hopi daño financiero. 

Aruba a tuma tempo pa negocia e parti aki sinembargo Hulanda no kier a cambia su posicion y a keda exigi pa prohibi e proyectonan PPP. Gabinete Wever-Croes 1 ni 2 a cera  PPP y no tin pensa di cera PPP manera e gobierno di AVP a cera. Sinembargo Hulanda su temor ta si den futuro bin un otro gobierno manera di AVP cu atrobe lo tuma decisionnan ekiboca pa finansas di nos pais.

“Na final a yega na un acuerdo riba e punto aki tambe y e ley por a wordo manda Parlamento di tal forma”, Prome Minister Evelyn Wever-Croes a duna di conoce.