Hilton Aruba Caribbean a inaugural su stacion di carga pa auto electrico

ORANJESTAD - Hilton Aruba Caribbean Resort a inaugural su stacion di carga pa auto electrico e siman aki. Minister Ursell Arends tabata invitado pa inaugura e stacion di carga aki. Un iniciativa di sector priva pero cu ta marca un momento clave den promocion di energia limpi y uzo di vehiculo electrico ariba nos isla. 

Minister Arends a wordo ricibi door di e Larry Tuck, Gerente General Hilton Aruba y Reinier Kooi Gerente General Avis, Budget,Payless kendenan a duna e mandatario splicacion amplio di e esfuersonan di nan compania pa un direccion mas sostenibel.

E stacion di carga yama 'D-Point' ta wordo poni disponibel pa dos espacio di parkeo cu ta ekipa cu e infrastructura necesario pa por carga e bateria di un auto electrico. Roel van Amerongen, Gerente di Compras di Dynaf kende ta proveedor di e stacion di carga a duna di conoce cu e 'D-Point' ta ful automatico y a duna demonstracion di con pa uz'e. E adicion aki ta bin despues cu diferente companianan cu ta huur auto a opta pa reemplasa algun di nan vehiculonan pa asina yama 'EV (Electric Vehicle) cars'. Pues e instalacion di e stacion di carga lo facilita e uzo y huurmento di e autonan aki entre turistanan.