Hopi hende presente na reunion riba asunto di RHD na Aruba

ORANJESTAD - Un cantidad grandi di persona a presenta na e reunion riba e asunto di RHD (Right Hand Drivers), cu e siman aki a bira un 'polemica'. E sala pafo di CB Playa Pabou tabata practicamente yen di hende cu a bin tende e ultimo informacion riba e topico aki, y scucha for di organisador di e reunion, Cristian Soto-Garcia, kico e plannan ta di un grupo di persona cu a forma un pagina di facebook. E intencion ta di cambia mente di e minister di husticia riba e medida cu kier pone riba  autonan aki. Ademas awe nochi tabata pa esnan interesa haya informacion y duna nan opinion riba e topico aki, esta e idea pa kita e autonan cu stuurwiel rechts, for di caminda dentro di poco. E idea aki no ta conta cu aprobacion di e grupo aki y nan kier haci algo pa convence e minister pues pa bin cu un alternativa. 

IDEA DI MINISTER DOWERS

Despues cu diadomingo pa medio di un relato di prensa, e noticia a keda anuncia cu kier kita e autonan aki for di caminda, e mandatario a coregi e informacion dos dia despues. "No ta berdad cu hendenan cu tin auto cu stuurwiel man drechi (Right Hand Drivers) tin cu baha nan auto for di caminda mesora pasobra lo tin un ley cu ta bisa esey" Dowers a  bisa. “Tin masha bruhacion awor. Ta un concepto tin riba cual ta wardando conseho. Y ora cu e conseho ey drenta, ta tuma accion”, e minister di husticia Arthur Dowers a clarifica na NoticiaCla.com awe mainta. E mandatario ta na altura di e reaccion grandi cu a drenta unabes cu e noticia a plama.

HOPI REACCION

E mandatario ta conciente cu tin masha hopi hende cu tin e tipo di auto akinan, y tambe ta conciente cu tin e polemica cu hendenan ta pensa cu e auto no mester tey y otronan ta pensa otro. Pesey a publica antemano cu tin intencion pa stop e autonan aki di core, pero no cu ta asina cu awor caba tin un prohibicion. E mandatario a haya hopi reaccion personalmente di hende cu a acerca cu preocupacion, indicando cu nan mester di nan auto RHD ‘pa hiba mucha scol, y pa no kita e auto pasobra e ta mi manera di yega trabou etc etc. E mandatario ta haya e discusionnan un bon forma cu tin comunicacion riba e tema aki awo. E mandatario ta compronde cu e hendenan cu tin e auto aki y no perde nan inversion.

PROME REACCION

E prome reaccion cu NoticiaCla.com a haya e siman aki, tabata di un ciudadano Eddie Arends. Segun Arends, pa un grupo di entre 750 pa 800 doño di auto (of mas) cu stuurwiel na man drechi, holoshi a cuminsa core, prome cu nan haya e prohibicion di core cu e autonan na Aruba. E decision di minister Arthur Dowers di husticia pa pone un paro na e autonan aki, no ta un sorpresa segun  Arends, cu ta un di e personanan mas conoci na Aruba cu tin e tipo di auto aki. Segun Arends, te awe, e no a haya un motivo ‘valido’ pa stop e autonan aki. E argumentonan conoci (peligroso, no por pasa den drive thru etc) no ta valido pa Arends.