Mas intercambio di studiante den Reino pa medio di Koninkrijksbeurs

Mas intercambio di studiante den Reino pa medio di Koninkrijksbeurs

Posted on 11/28/2023 2:46 pm AST | Updated on 11/28/2023 3:12 pm AST

DEN HAAG/ ORANJESTAD - Entrante otro aña di estudio, mas of menos 120 studiante pa aña por bay pa intercambio of stage den Reino pa medio di e asina yama Koninkrijksbeurs. Esaki ta un programa nobo di mobilidad pa tur studiante den Reino, cu ta enfoca riba aumenta e intercambio di studiante pa termino cortico. Recientemente, e prome cinco studiantenan Caribense a cuminsa na Hulanda cu un Koninkrijksbeurs. Pa e aña di estudio aki, ta spera cu mas of menos 25 studiante lo haci uzo di esaki. Koninkrijksbeurs ta un di e medidanan pa yuda studiante Caribense den nan carera di estudio.

Ta importante pa traha riba mehoracion di exito di estudio di studiante Caribense. For di un investigacion reciente ta resulta cu e cambio di rumbo di estudio den wo y hbo ta (hopi) mas halto cerca studiante cu pre-estudio den parti e Caribense di Reino cu studiante cu a sigui nan pre-estudio  na Hulanda Europeo. Den e nivel universitario (wo), e porcentahe di studiante cu ta cay afo for di e estudio den e prome aña ta mas halto entre studiante di e parti Caribense. Hopi studiante Caribense ta topa cu extra dificultad durante nan estudio, por ehempel na Hulanda. Un di e motibonan ta e gran transicion pa studia na Hulanda, cu ta resulta den un cantidad relativo halto di studiante cu ta cay for di nan estudio. Ademas, studiante Caribense tin cu lidia cu hopi problema practico, manera vivienda y haya un BSN (Number di Seguro Social).

PREVENI ‘DROP-OUT’ Y DESAPUNTO

Koninkrijksbeurs ta un programa nobo di mobilidad pa tur studiante den Reino: mbo, hbo y wo. E programa tin como meta aumenta intercambio di duracion cortico di studiante entre e paisnan den Reino. Dus, por ehempel, un studiante di Hulanda cu ta bay University of Curaçao Dr. Moises Da Costa Gomez (UoC), of un studiante di Aruba cu ta bay Hulanda pa haci su practica. Ta un enriquecimento di nan carera di estudio y ta duna oportunidad, specialmente pa e studiante Caribense, pa purba prome cu sosten financiero si studia na Hulanda ta pas cu nan prome cu scohe pa un estudio completo. Studiante por sigui materianan pa un periodo maximo seis luna na un instituto na Hulanda. E meta ta pa evita fayo di estudio y desapunto si nan lo scohe directamente pa un estudio completo. Asina, ta contribui na exito di estudio y igualidad di oportunidad pa studiante Caribense. Menos ‘drop-out’ for di estudio tambe ta reduci e problema di debe cu hopi studiante ta confronta cu ne. Esaki ta pone limitacion na nan regreso na nan isla di origen y ta causa brain drain. Koninkrijksbeurs ta haci studiamento na propio isla mas atractivo y ala vez ta duna oportunidad pa bay afo pa un temporada cortico pa intercambio.

Minister Dijkgraaf: "Tabata hopi inspirativo pa recientemente sera conoci cu e prome studiantenan cu un Koninkrijksbeurs. Introduccion di e beurs aki ta un paso importante y concreto pa duna mas perspectiva, exito di estudio y igualidad di oportunidad na studiantenan Caribense. Cu e programa di intercambio aki nos ta uza e forsa di e cuater paisnan den Reino."

‘ERASMUS+' DEN REINO

Koninkrijksbeurs ta comparabel cu e programa Erasmus+ cu ta duna studiante e oportunidad pa sigui un semester na un instituto Europeo cu sosten financiero. Cu Erasmus+, bo por bay como studiante for di Aruba, Curaçao, Sint Maarten, Hulanda of e islanan cu ta forma Hulanda Caribense: Bonaire, Saba, Sint Eustatius cu un beurs pa tur pais Europeo pa intercambio of practica, pero esey no por sosode den Reino. E sumanan di beurs ta comparabel cu Erasmus+, den e reglamento di subsidio (cu ta actualmente den consulta riba internet) ta menciona cu studiante Caribense por haya un beurs di maximal 5900 euro.

Den e aña academico aki, ta spera cu un total di mas o menos 25 studiante piloto lo haci uzo di e beurs nobo. E meta ta pa, for di aña academico 2024-2025, mas of menos 120 studiante por beneficia di e Koninkrijksbeurs pa aña. Hulanda ta destina un total di 0,6 miyon euro pa e programa nobo di mobilidad. Studiante tin te 1e di mei 2024 pa haci nan aplicacion pa un beurs pa september 2024. 

AUMENTA EXITO DI ESTUDIO

Koninkrijksbeurs ta un di e medidanan pa amplia exito di estudio y oportunidad igual pa studiantenan Caribense. E topico aki tabata halto riba agenda di Conferencia Ministerial di Enseñansa di Cuater Pais siman pasa na Den Haag, e biaha aki bou di presidencia di Hulanda. E ministernan a acorda pa forma un team di programa cu lo percura pa mehoramento structural di exito di estudio den e proximo tres añanan.

Pa engrandece e posibilidad di exito di studiante den enseñansa avansa, e cuater paisnan a inicia  Caribbean Academic Foundation Year. Esaki ta un aña pre-academico conhunto pa prepara studiante mihor pa nan estudio na hbo y universidad. Esaki mester haci e transicion for di enseñansa secundario pa enseñansa avansa mas facil, tanto academicamente como personalmente. Tambe ta tira bista riba e oferta di enseñansa riba e islanan. E prome paso ta un analisis di e mercado laboral pa identifica e deficiencianan den mercado laboral pa region Caribense.'

  • CDA ta cuestiona cooperacion cu kier a cera cu Aruba aña pasa

    CDA ta cuestiona cooperacion cu kier a cera cu Aruba aña pasa

    VENRAY – Lider di fraccion di partido CDA pa Venray na Hulanda ta cuestiona e acuerdo di cooperacion cu Aruba. E kier sa kico a para cu e plannan di cooperacion y kico esaki ta nifica pa Venray. Sigur pa cu e inclusion di mas capacidad di ambtenaar. E lider di fraccion, Anna Thielen ta cuestiona tur esaki. Aña pasa na April prome minister Wever Croes a bishita Venray, unda cu a palabra cu lo haci un investigacion pa desaroya acuerdo di cooperacion riba tereno di e.o. cultura, enseñansa. Thielen kier sa con a para cu esaki. E partido di oposicion a cuestiona e capacidad di ambtenaar cu tabatin mester pa logra tur e loke kier a logra cu Aruba. E partido a haya cu tabatin cosnan mas importante cu mester a haya prioridad y como tal a para e ‘investigacion’. Awor cu ainda un aña despues no tin ningun informacion riba e tema, Thielen a dicidi di haci pregunta. “E investigacion a termina? Kico a logra, y kico ta e gastonan haci?” Thielen ta puntra. Ta spera cu pa otro siman tin contesta riba esaki. 

  • Schiphol ta experimenta cu control digital di pasaporte pa reduci fila

    Schiphol ta experimenta cu control digital di pasaporte pa reduci fila

    SCHIPHOL – Aeropuerto principal di Hulanda, Schiphol, ta experimentando cu un documento di biahe digital, cu cual marechaussee por controla pasaporte. E speransa ta cu esaki por evita filanan largo pa biahenan intercontinental. Hulanda ta haciendo prueba cu e asina yama Digital Travel Credential (DTC) hunto cu Canada, riba peticion e comision Europeo. Solamente biaheronan cu biaha cu KLM desde Canada pa Hulanda, por participa. E biaheronan ta ricibi un email un invitacion riba e mail riba cual nan buelo cu KLM ta reserve. Den un app special, nan por subi un potret di cara, yena nan informacion di pasaporte, y contesat pregunta. E autoridad di control na frontera por haci controle asina delanta. Na aeropuerto e baihero ta tene nan pasaport contra un porta di frontera. Si e control anterior tabatin exito, y tin un match entre e DTC y e pasaporte en cuestion, e pasahero por sigui cana. Como tal, e pasaporte si ta keda necesario pa biaha cu ne.  

  • Sospechoso di asesinato di rapper Bigidagoe, deteni na aeropuerto na Paris

    Sospechoso di asesinato di rapper Bigidagoe, deteni na aeropuerto na Paris

    PARIS – Riba e aeropuerto di Paris, autoridad a detene e homber Hulandes di Amsterdam, relaciona cu e asesinato diadomingo marduga di e conocido rapper Bigidagoe, di cual su nomber oficial ta Danzel Siols (26). E sospechoso tabata apunto di biaha pa Guyana Frances. Bigidagoe a bay un fiesta diasabra anochi cu amigonan na un adres na Hulanda. Despues di e fiesta e kier a bay cas y riba e tereno di parkeer, e la wordo tira mata. Na hospital un rato despues e la fayece. E homber sospechoso, a keda entrega na autoridad Hulandes. 

  • Van Huffelen na Tweede Kamer: Aruba mes a acorda RAFT, y despues ‘hala atras’

    Van Huffelen na Tweede Kamer: Aruba mes a acorda RAFT, y despues ‘hala atras’

    DEN HAAG –A base di un serie di pregunta di por lo menos 3 diferente partido Hulandes di Tweede Kamer riba e tema na e secretario di estado Hulandes van Huffelen, e mandatario Hulandes awe (diamars) a bolbe confirma cu Aruba mes a acorda e ley di Reino pa supervision na 2020 y despues a hala atras. E preguntanan tabata a base di contesta cu e mandatario Hulandes a duna riba otro pregunta riba e supervision financiero, den luna di December di aña pasa. Y ni maske con e preguntanan tabata formula, van Huffelen a para ariba cu e no ta cambia di opinion, y cu sin un Ley di Reino, no tin acuerdo pa interes mas abou.  E partidonan cu a haci pregunta tabata entre otro Groenlinks/PvdA, ChristenUnie, y Partij voor de Dieren PvdD. 

  • Secretario di Estado Van Huffelen ta bay foro di LGO na Bruselas

    Secretario di Estado Van Huffelen ta bay foro di LGO na Bruselas

    BRUSELAS - Sekretario di Estado Alexandra van Huffelen di Relashon di Reino i Digitalisashon lo partisipá riba djaweps 29 di febrüari, na e reunion di nivel haltu di e Foro pa Pais i Teritorio di Ultramar (Landen en Gebieden overzee, LGO) na Bruselas.

  • Na Hulanda, gran parti di scol primario y secundario ta malo den ‘rekenen’

    Na Hulanda, gran parti di scol primario y secundario ta malo den ‘rekenen’

    AMSTERDAM – Un gran parti di alumonan secundario di scolnan primario na Hulanda ta malo den rekenen y wiskunde. Esey ta e resultado di un investigacion di inspeccion di enseñansa. Debi na e deficiencia tin e pregunta si nan lo por alcansa e nivel legalmente pidi, na final di e scol secundario.  Alumnonan den nivel di VMBO ta bou di e nivel rekeri. Mas cu 72% no ta alcansa e nivel 1F den e di dos aña. Pa esnan di HAVO y VWO, 20% no ta alcansa e nivel 2F despues di e di dos aña. Nivel 2F ta necesario pa  funciona socialmente y pa termina un enseñansa nivel MBO. Alumnonan cu no ta domina esaki, por yega na un atraso riba nivel social den comunidad. Y esey ta preocupante segun e inspeccion.

  • Powered by SETAR