Relaciona cu caso Flamingo, awe Hof ta trata caso pa dicidi si ta persigui hende di KPA, LR y RST

ORANJESTAD - Awe Hof ta trata e caso unda cu ex minister Otmar Oduber ta exigi un investigacion den e caso cu 3 agente/funcionario di KPA, Landsrecherche y RST lo a actua incorecto den e caso di Oduber den caso Flamingo. Hof mester dicidi si tin suficiente pa persigui e tres personanan aki. 

KICO A SOSODE

Segun Oduber, e tres personanan en cuestion lo a traha 8 Procesverbaal (PV) cu lo a resulta di ta basa riba redo y nada real, pero si a worde uza pa inicia henter e caso di Flamingo. Segun Oduber, OM ta nenga di investiga nan pa cual  awe ta bai HOF pa wak si ta logra un investigacion imparcial den esaki. 

IMPARCIAL

Segun Oduber, OM claramente no ta imparcial aki. E ta mustra cu 8 procesverbal y di cual niun a resulta di ta berdad, pero si kier a buska “Spijkers op laag water” pa no perde cara y ta nenga di habri un investigacion pa determina kon esaki por tabata possible. Segun Oduber, ta trata di un caso no solamente unico pero determinante pa un y tur, pa cu e confianza y imparcialidad cu mester tin den nos sistema judicial. 

USA INFORMACION ‘FALSO’

Segun Oduber, e hecho cu OM no a uza ni un di e 8 proces verbaal nan aki den e caso penal andando awo, e kier sa ta di unda e informacionan falso aki a bin y si aki trata di valsheid in geschrifte/mijneed of gewoon a chupa e informacionan aki for di nan dede.