Na Corsou a cera 6 restaurant den centro comercial Sambil pa situacion a-higienico

WILLEMSTAD - Despues ku den wikènt a sera diferente establesimentu pa iregularidat manera situashon a-higiéniko i inkumplimentu ku seguridat, ayera a toka turno pa 6 mas. E bia aki e tim di kontrol a bai sentro komersial Sambil.

Por a komprondé di inspektor di MEO Ronny Cornelis, nan a haña reklamo di hende ku a bai kome den wikènt na restorantnan den Sambil i a bira malu. Ya kaba e kontrol tabata plania pa tuma lugá aki pero nan a disidí di hasié mas promé ku tabata ayera.

I loke e tim a topa tabata un porkeria, hopi shushedat i un situashon a-higiéniko.

Segun inspektor ekonómiko sr Cornelis a bisa for di djabièrnè ora nan tabata na e sentro komersial aki pa un aktividat nan a ripara damanan ku ta bende kos ku uña asina largu.

Ayera ora nan a bai nan a topa lugánan sushi, diferente trahadó ku karchi di kùr kaduká for di 2019, otro lugá ku plafòn a bin abou i for di e plafòn aki shushi ta kai paden den e kushina kaminda ta prepará kuminda.

Kushinanan ku vèt akumulá pasobra no ta limpia e establesimentunan aki regular. Sr Cornelis ta bolbe enfatisá ku negoshinan ta purba spar ku e parti di limpiesa i nan ta haña e kuenta presentá di e forma aki. Ta sera nan establesimentu pasobra e ta sushi. NOTA: Texto ta scirbi den Papiamento fonetico di Corsou.