Gobierno di Aruba ta keto ainda riba e acuerdo yega cu Hulanda riba e LAFt nobo

ORANJESTAD – For di diabierna mainta cu a bira conoci cu Aruba y Hulanda a haya otro riba e acuerdo ‘nobo’ pa un Landsverordening Aruba Financieel Toezicht (LAFt), no a tende nada oficial di banda di gobierno di Aruba. Tabata diabierna mainta ora cu noticiacla tabata parti di un momento di prensa cu demas periodistanan local y di Reino, cu e secretario di estado Hulandes Alexandra van Huffelen cu a confirma cu Aruba y Hulanda tin un acuerdo nobo, cu a dicidi cu ta sigui (pa awor) cu e LAFT nobo. Riba pregunta di noticiacla, e mandatario a confirma cu tur tres punto cu Hulanda a bin cune ultimo como exigencia, di cual tin entre otro un siguransa cu no ta bin cu proyectonan PPP y e acuerdo riba personal di gobierno. E mandatario a admiti tambe cu awor ta keda na gobierno pa presenta esaki na parlamento  di Aruba pa su aprobacion. Y den esaki e tin te mitar di December pa por keda cla y aproba esaki prome cu fin di e aña aki. Parlamento tin e ultimo palabra pa cu esaki. 

ARUBA TA KEDA

Pa sorpresa, for di gobierno di Aruba, no a sali ni un mensahe di esaki. Ni pa confirma, ni pa desmenti, aunke cu ta Hulanda a confirma esaki pa nos y tin esaki riba video. Esaki, esta cu Aruba ta keda keto, no ta usual mirando e forma con gobierno ta opera ora cu tin noticianan asina. Ta bin cu hopi atencion, tin ta yame te hasta fanfaria, pa informa cu ‘a logra otro acuerdo’ cu Hulanda etc etc. Noticiacla a haci intento tanto cu prome minister (cu normalmente ta reacciona mesora) y minister Maduro, pero ambos ta keto riba e tema aki. 

BONDIA ARUBA

Den Bondia Aruba a Sali un relato diasabra, unda cu ta cita Noticiacla como e fuente cu a publica e noticia di e acuerdo riba LAFt, pero cu gobierno di Aruba mes no a tende nada oficial ainda, y cu nan ta ‘wardando confirmacion’. Y e matutino ta cita prome minister, pues nan a logra haya contacto cu ne, y e lo a bisa nan esey, segun e matutino. E unico cos cu por pensa ta cu gobierno di Aruba riba nivel gubernamental no a tende nada, ya cu esaki lo por a bay riba nivel di ambtenaar so y ey no a comunica ainda. Manera ta conoci, e forma con ta haci esaki ta cu prome ta trata riba nivel di ambtenaar, y despues ta pasa pa un acuerdo final di gobiernonan. Pero si mester kere e declaracion di prome minister, aunke cu secretario di estado Hulandes si a confirma esaki diabierna, pa un of otro motibo, esaki no a yega cerca gobierno di Aruba ainda. Te cu diadomingo anochi, no a ricibi ningun señal di gobierno di Aruba riba e tema.

PENDIENTE 

Lo keda pendiente pa wak si e siman aki si e mensahe yega, laat, pero yega, y mas importante, kico e gobierno di Aruba lo bisa riba e tema, y porta mas importante ainda, si Parlamento ta bay aproba esaki. Van Huffelen a bisa si cu aunke cu tin un LAft, ta considera esaki temporal, pasobra Hulanda ta keda exigi pa un RAFT bin na lugar di e LAFt, pa e solo motibo cu un LAFt por wordo cambia unilateralmente pa Aruba y e RAFT no.