Gil: Athlete’s Foot tin acuerdo cu FCCA pa pone building wrap

ORANJESTAD – E negoshi Athlete’s Foot tin permiso pa pone e asina yama ‘building wrap’ riba e edificio conoci como ex Interbank den Caya Betico Croes. Por lo menos segun e propietario Francis Gil. Den comunicacion cu NoticiaCla.com, Gil ta mustra cu for di momento di diseño di e lugar, esaki tabata planea pa haci. “For di comienso e la wordo mustra na minister, na infrateam. Nos a meet cu FCCA, director di FCCA. Tur pa nos ta riba e mesun pagina” Gil a bisa. E intencion segun Gil, ta pa embeyese caya grandi. Y esaki ta trata tanto e tienda como e banner (building wrap).

BUILDING WRAP

E building wrap porta pa Aruba ta algo nobo, pero ta algo ya internacionalmente segun Gil. “E la crea un impacto grandi pa cu e design” Gil ta bisa. E ta referi na e moda internacional, y specificamente down town Miami, unda cu tin por lo menos 10 edificio cu tin un tipo di wrap asina. “Mi ta papiando di office buiding, hotel, varios edificio grandi”. Gil ta sigura cu tin tur permiso pa e wrap aki.

DIA LIBER

Gil ta admiti cu enberdad a pone e wrap aki riba un dia liber (1 di mei) pasobra tabatin mester di instal’e, usando stellage etc. A scohe un dia pa no tin publico. “Pero si e la wordo besproken cu tur e personanan concerni” Gil a sigui bisa. Te caminda cu e sa, pa e pone e banner riba e edificio, e no tabatin mester di un permiso special.

KEHO

E kehonan cu tin cu e wrap/banner ta haci zonido fastioso, lo wordo remedia segun Gil. Un di e problemanan ta cu Aruba ta pasando den un periodo di biento fuerte. E biento in usual ta pone cu ora cu a ubica e banner, a mira e parti di e banner cu a bin 40 cm mas chikito di loke e mester tabata. “E siman aki e fabricante di e banner ta bezig ta remediando e situacion ey caba pa e ultimo pida wordo manda Aruba y verstrek e pa evita cu e no ta bay bati ningun caminda” Gil a sigui bisa.

Segun Gil, ora cu tin inversionnan grandi manera e loke cu nan a haci, na beneficio tambe di Caya Grandi, ‘cosnan chikito por sinta na mesa pa trece solucionnan pa cu esey’.