Na Corsou, gobierno y boticanan ta topa otro den corte awe

WILLEMSTAD - Gobièrnu di Kòrsou a disidí ku e lo bai korte ku e Asosiashon di Doñonan di Botika (VAE) pa obligá botikanan pa habri for di 8or di mainta enbes di 1or di mèrdia manera nan a bin ta hasi for di ayera. Segun Minister di Salubridat, Medioambiente i Naturalesa, sr. Javier Silvania, e loke doñonan di botika ta hasiendo ta kontra lei i ta perhudikando e pashènt.

Manera ta konosí, djárason último doñonan di botika a kanta akshon i huntu ku nan empleadonan nan a akudí na Forti unda a konfrontá e minister ariba menshoná. VAE ta bisa ku nan tin komo binti aña ta soportá ku gobièrnunan di turno ta hasi palabrashon i promesa pero nunka ta kumpli, pero awor si ta basta i nan ke un desishon riba kobertura di e “receptregel vergoeding” ku ne momentunan aki ta fl. 7.- pero ku nan ta proponé pa bira fl. 10.-.

Segun sr. Silvania den deklarashon pa prensa, ta iresponsabel di parti di VAE pa habri te 1or enbes di 8or. El a yega di reuní ku nan kaba i a palabrá ku nan ku lo warda 6 luna pa e “Outoridat di Kuido” por hasi su investigashon i duna un veredikto riba esaki. Pero VAE no ke warda i a disidí ku nan ta kibra ku lei i habri 1or. Gobièrnu a yega di sinta ku nan i tambe SVB na mesa, pero komo ku no por a Sali afó a opta pa laga e Outoridat di Kuido hasi un investigashon imparsial.

Segun Silvania, e por komprondé e frustrashon dje botikarionan pero no ta su falta ku durante hopi aña nada no a bin afó, e si a disidí di tuma pasonan konkreto pa yega na un desishon definitivo.

Pero teniendo kuenta ku VAE ta keda para riba su punto, esta ku nan lo keda mantené e orario di 1or di mèrdia pa 7or djanochi, gobièrnu a disidí ku lo entamá un huisio sumario awe mainta pa obligá botikanan pa habri 9or di mainta. Lei ta indiká bon kla ku botikanan mester habri di 8or di mainta pa 7or djanochi i ku mester tin botika disponibel tur dia i 24/7, ta p’esei tur dia tin dos botika na warda pa garantisá ku un pashènt por haña remedi. “Salú di hende no ta kos di hasi wega kuné”, asina e mandatario a finalisá bisando.

A komprondé ku e huisio sumario lo ta awe mainta pa 08:30or i ku interesnan di gobièrnu lo ta den man bufete di abogado Braam.

BOTICANANDoñonan di botika tambe a disidí ku nan lo bai korte ku gobièrnu awe den un huisio sumario, meskos ku gobièrnu a hasi ku nan. Gobièrnu ta bai korte pa obligá nan pa habri 8or di mainta enbes di 1or di merdia, pero nan lo pidi korte pone e kosnan stret i pa gobièrnu kumpli ku palabrashonnan hasí. Asina por a komprondé for di un konferensia di prensa ku VAE a konvoká ayera mainta. Durante e enkuentro ku prensa aki srs. Bram Niesink i tambe Johnathan Middelhof a hiba palabra i a duna di konosé ku loke doñonan di botika ta proponiendo no ta algu eksagerá.

E problema ta ku, pa años a splika gobièrnu i SVB ku e 7 florin ku nan ta risibí pa e “receptregel vergoeding” no ta yega pa kubri nan gastunan. Loke nan ta proponé ta pa hasi esaki 10 florin ku a kubri no solamente nan gastunan, sino tambe e 1 florin ku kada pashènt tin di paga pa kada remedi preskribí dor di su dòkter. Tin hopi hende ku no tin moda di paga esun florin ei i komo tal e lo por ser kubrí den e 10 florin proponé.

Pero si gobièrnu ta opta pa bai korte, anto VAE tambe lo akudí na korte pa reklamá loke e ta kere ta hustu. Segun sr. Niessink, e ròl di botika den henter e kadena aki ta di duna e servisio, esta di traha òf duna e remedi ku e pashènt bin buska. E botika no tin i lo no trata tampoko di tin influensia riba e komportashon di e dòkter di kas. Ta e dòkter ta determiná ki tipo i kuantu remedi un pashènt tin mester i e botika simplemente mester duna e servisio. Den kaso ku e botika tin algu di duda mes den un remedi preskribí, e lo tene kontakto ku e dòkter en kuestion, pero e a algu ku ta sosodé masha poko.

Un botika su gastunan ta hopi haltu, ya ku e tin di sòru pa e tin tur klase di remedi den stòk pa por duna e pashènt, tantu remedinan karu komo barata. I hopi bes ta e botikanan ta sòru pa nan tin remedinan karu den stòk pa motibu ku CMC mes no por kumpra nan. Pero VAE no ta bai warda mas, pasobra e kuestion di laga e investigashon den man di e Outoridat di Kuido por ta otro strategia pa trese tardansa. E Outoridat di Kuido ta un órgano ku mester ser lantá ainda. Meskos ku sr. Silvania, VAE a sinta ku yen otro minister sin ku nada a bin afo te awe despues di binti aña. Tur kos ta keda na palabrashon i nunka ta tuma desishon. VAE no tin intenshon di bai sinta warda seis luna mas.