Morto di e homber hulandes na Piedra Plat no ta relaciona cu crimen

ORANJESTAD – E morto di e homber hulandes Nagtegaal, no ta relaciona cu un crimen. Esaki e autopsia haci awe merdia a conclui segun vocero di ministerio publico Ann Angela, na NoticiaCla.com esaki ta nifica cu a laga e curpa liber mesora y entrega esaki na e famia pa entierro.

E CASO

Tabata diasabra ultimo pa 8.00 di mainta ora cu a drenta informe di cu tin un persona den auto cu no tabata duna señal di bida, na adres Piedra Plat 45. Mesora a dirigi tanto polis como ambulance na e sitio. Na yegada di e patruya a bin compronde cu aki ta trata di un persona masculino, Aart D.N. Nagtegaal, naci na Rotterdam dia 12 di Februari 1954, cu lo ta drumi di largo riba e sienta patras di e Mercedes Benz GL 450 A32754. Mesora a solicita presencia di autoridadnan competente pa asina inicia cu e investigacion. Dokter Lin a constata morto 8.37 am y despues di esaki Fiscal Pronk a tuma e curpa den beslag. Fotonan ta di e momento di diasabra cu a haya e curpa den su auto den su cura di cas na Piedra Plat.